Kína mótmælir sambandi Bandaríkjanna og Taívan

Kínversk yfirvöld setja sig harðlega upp á móti hvers kyns viðskiptasambandi milli Bandaríkjanna og Taívan. 

Yfirlýsing þess efnis var gefin út í dag, í kjölfar þess að Bandaríkin og Taívan tilkynntu að þau hyggðust styrkja sitt efnahagslega samband. 

Kínversk stjórnvöld halda því fram að Taívan sé á þeirra yfirráðasvæði og hafa hingað til staðið því í vegi að Taívan taki þátt í alþjóðasamfélaginu sem fullvalda ríki. 

„Kína mun ávallt setja sig upp á móti hvers kyns opinberum samskiptum kínverska héraðsins Taívan við önnur ríki. Þar á meðal undirbúning og undirritun opinberra efnahags- og viðskiptasamninga,“ segir Gao Feng, talsmaður viðskiptaráðuneytis Kína.

Frétt af mbl.is

Bandaríkin tilbúin að verja Taívan

Frétt af mbl.is

Ekki eigi að vanmeta getu kínversku þjóðarinnar

Taívan framleiðir hálfleiðara

Fyrsti fundur samningaviðræðna milli Bandaríkjanna og Taívan er áætlaður seinna í júní. Þá verður farið yfir tolla á landamærum, regluverk í kringum landbúnað og réttindi verkamanna. 

Taívan er í dag tíunda stærsta útflutningsríki Bandaríkjanna en jafnframt einn stærsti framleiðandi hálfleiðara, sem notaðir eru í svokallaðar örflögur (e. microchip), sem notaðar eru við framleiðslu raftækja, allt frá farsímum yfir í bíla. 

• Blogga um frétt