Vonin úti um að finna blaðamanninn á lífi

Eiginkona og tengdamóður breska blaðamannsins, Dom Phillips, segja vonir þeirra vera úti um að finna Phillips á lífi en hann og Bruno Pereira hurfu spor­laust í Amazon regnskóginum í Bras­il­íu fyrir viku.

Frétt af mbl.is

Kalla eftir áframhaldandi leit að mönnunum

The Guardian greinir frá þessu en Phillips skrifaði fyrir miðilinn.

Brasilíski herinn, lögregla og innfæddir á svæðinu hafa leitað mannanna tveggja en leitin hefur lítinn árangur borið.

Brasilíski herinn hefur komið að leitinni. AFP

„Þeir eru ekki lengur með okkur,“ skrifaði tengdamóðir Phillips á Instagram. 

„Sálir þeirra hafa gengið til liðs við svo marga sem hafa látið lífið til varnar regnskóginum og frumbyggjum þess. Í dag eru þeir hluti af gríðarlega öflugri lífsorku þessa gróðurlendis sem er hjarta Brasilíu.“

Mennirnir tveir hurfu í lok rannsóknarferðar fyrir bók Phillips um sjálfbæra þróun á svæðinu. Þeir höfðu starfað saman lengi og voru að taka viðtöl við innfædda á Vale do Javari svæðinu. Er bátur þeirra kom ekki á tilsettum tíma í bæinn Atalaia do Norte var hvarf þeirra tilkynnt.

Lögreglan hefur handtekið einn mann í tengslum við málið sem hafði hótað Phillips og Pereira daginn áður en þeir hurfu. Leifar af blóði fundust í bát hans.

Phillips hafði skrifað tölu­vert um ólög­leg­ar veiðar á þess­um slóðum en Pereira hef­ur bar­ist gegn slíku at­hæfi. Hef­ur hann í kjöl­farið fengið líf­láts­hót­an­ir og því hef­ur vaknað grun­ur um að menn­irn­ir hafi verið tekn­ir af lífi eða þeim rænt.

Dom Phillips og Bruno Pereira hurfu spor­laust í Amazon regnskóginum í Bras­il­íu fyrir viku. AFP

• Blogga um frétt