Hæstiréttur heimilar bann við þungunarrofi
Setja bókamerki
Hæstiréttur Bandaríkjanna hefur afnumið réttinn til þungunarrofs í landinu, í dómi sem kveðinn var upp rétt í þessu. Með dóminum er nærri hálfrar aldar gömlu dómafordæmi snúið við, sem fólst í niðurstöðu réttarins í máli Roe gegn Wade árið 1973.
Dómurinn hefur þá þýðingu að einstök ríki geta sjálf valið að leyfa eða leggja bann við þungunarrofi.
Veiti ekki rétt til þungunarrofs
„Stjórnarskráin veitir ekki rétt til þungunarrofs; [fordæmum] Roe og Casey er hnekkt; og valdinu til að setja lög um þungunarrof er skilað aftur til fólksins og kjörinna fulltrúa þess,“ segir í niðurstöðu réttarins, sem birt var fyrir skömmu.
Í kjölfar þessa dóms verður þungunarrof að líkindum bannað með lögum í mörgum ríkja Bandaríkjanna, jafnvel helmingi þeirra. Er þá um að ræða ríki á borð við Georgíu, Suður-Karólínu, Tennessee, Texas og fleiri ríki.
Samkvæmt gögnum sem tekin hafa verið saman hefði bann við þungunarrofi mest áhrif á ungar konur, konur sem eru undir fátæktarmörkum og svartar konur, en konur í þessum hópum þykja tölfræðilega líklegastar til að nýta sér réttinn til þungunarrofs.
Frá árinu 1973 og til dagsins í dag
Samkvæmt niðurstöðu Hæstaréttar Bandaríkjanna frá 22. janúar 1973, og allt til dagsins í dag, hafa konur átt rétt á að láta rjúfa þungun þar til fóstur hefur náð þeim þroska að geta lifað sjálfstæðu lífi utan líkama konunnar, en það er áfangi sem fóstur ná yfirleitt á 22.-24. viku.
Úrskurðurinn hefur verið gífurlega umdeildur í Bandaríkjunum og margoft hefur verið reynt að fá honum hnekkt eða þá að fá réttinn til þess að þrengja túlkun sína.
Réttur til þungunarrofs hefur átt undir högg að sækja í Bandaríkjunum síðustu misseri og hafa mörg ríki viljað setja strangar reglur sem gerir konum erfiðara að fara í þungunarrof.
Stormur á Þorláksmessu en víðast hvar stefnir í hvít jól
Funda með þingflokkum
„Tímabil aukinnar eldvirkni“
Víkingar komnir yfir 800 milljónir í greiðslur
Barn lést í árásinni
Var engin kristnitaka árið 1000?
