Enn á huldu hvað olli dauða unglinganna

Minnst tuttugu og einn unglingur fannst látinn eftir að hafa verið að skemmta sér á bar í borginni Austur-London, í Suður-Afríku. Enn er á huldu hvað olli dauða unglinganna, en engir áverkar fundust á líkunum á vettvangi. 

Frétt af mbl.is

17 fundust látin á skemmtistað

Stærsti hluti hópsins voru nemendur í menntaskóla sem höfðu farið út á lífið að fagna próflokum. 

Yfirvöld hafa útilokað að þrengsli hafi getað valdið dauða unglinganna, og þar sem engir líkamlegir áverkar voru á líkunum, leikur grunur á því að þeim hafi verið byrlað eitur. Tekin verða sýni og þau rannsökuð svo unnt verði að komast til botns í dánarorsök unglinganna. 

„Þau eru nokkuð ung“

Foreldrar unglinganna, sem og aðrir íbúar í grenndinni, hópuðust saman fyrir utan barinn í dag, þar sem líkin voru flutt af vettvangi. 

Bheki Cele, yfirmaður lögreglumála í borginni, brast í grát í viðtali við blaðamenn eftir að hafa kynnt sér aðstæður í eigin persónu. 

„Þetta er skelfileg aðkoma, þau eru nokkuð ung. Þegar manni er sagt að þetta séu þrettán og fjórtán ára krakkar, og svo ferðu og sérð þetta. Það fer með þig.“

Fjöldi fólks kom saman til þess að fylgjast með rannsókn lögreglu og því þegar lík unglinganna voru borin út af barnum. AFP

Sautján létust á barnum, hin á spítala

Átta stúlkur og þrettán piltar létu lífið. Sautján þeirra fundust látin inni á barnum en hin létust á spítala. 

Drykkjualdur á svokölluðum hverfisbúllum eru átján ár í Austur-London, Suður-Afríku. Eftirlitið er þó ekki strangt. 

Frétt af mbl.is

Tala látinna á skemmtistaðnum hækkar

Cyril Ramaphosa, forseti Suður-Afríku, lýsti yfir samúð sinni með fjölskyldum unglinganna. Hann hafði þá einnig orð á því að það væri áhyggjuefni að svo ungt fólk væri samankomið á stað, sem ætti aðeins að vera opinn þeim sem náð hafa átján ára aldri. 

Yfirvöld hafa nú til skoðunar hvort breyta þurfi áfengiskaupaaldrinum í Suður-Afríku, en þar er áfengisneysla ein sú mesta sem fyrirfinnst í Afríku. 

• Blogga um frétt