Erlent | mbl | 3.7.2022 | 12:14 | Uppfært 13:14

„Aldrei séð neitt þessu líkt“

Lögregla í Bandaríkjunum. Myndin tengist fréttinni ekki með beinum hætti. AFP

Fjöldi lögreglumanna í Akron í Ohio-ríki hefur verið sendur í leyfi í kjölfar þess að Jaylen Walker, 25 ára svartur maður, lést eftir skothríð lögreglu.

Walker var skotinn er hann reyndi að flýja lögreglu fótgangandi eftir að hafa verið stöðvaður fyrir brot á umferðarlögum. Yfirvöld í borginni búa sig undir mótmæli, en myndskeið af atvikinu verður birt í dag.

Bobby DiCello, Lögfræðingur Walkers, segir að myndskeiðið sýni Walker á hlaupum, óvopnaðan, þegar lögreglumenn hófu að skjóta á hann, yfir 90 sinnum. Að sögn DiCello varð hann fyrir að minnsta kosti 60 skotum. New York Times greinir frá.

Átta lögreglumenn að verki

„Ég hef verið réttarlögmaður í 22 ár og ég hef aldrei áður séð neitt þessu líkt,“ segir DiCello. Hann segir átta lögreglumenn hafa verið að verki en yfirvöld hafa ekki staðfest þá tölu.

Í fyrstu tilkynningu lögreglu um málið, sem gefin var út á þriðjudag, segir að lögreglumennirnir hafi gert tilraun til þess að stöðva Walker fyrir brot á umferðarlögum. Walker hafi haldið áfram að aka og hleypt af skoti úr byssu að sögn lögreglu.

Nokkrum mínutum síðar hafi Walker hægt á bílnum og farið út, á meðan bíllinn var enn á ferð. Lögregla elti Walker inn á bílastæði þar sem hann var svo skotinn. Í tilkynningunni er tekið fram að verknaður Walkers hafi gefið lögreglu ástæðu til þess að halda að hann væri lífshættulegur.

Mótmæli gegn lögregluofbeldi í garð svartra Bandaríkjamanna hefur verið áberandi. AFP

DiCello segir það rangt og ekkert í myndskeiðinu gefi til kynna að Walker hafi ögrað eða hrætt lögreglumennina á einhvern hátt. Því hafi enginn ástæða verið fyrir því að skjóta hann.

DiCello dregur líka í efa frásögn lögreglu um það að Walker hafi hleypt af skoti þar sem rúðurnar á bílnum hans eru óbrotnar. Í bílnum hans fannst byssa, sem hann var ekki með í fórum sínum er hann flúði lögreglu fótgangandi.

Walker hafði ekki komist áður í kast við lögin og aðeins fengið eina umferðarsekt. Hann vann sem sendill fyrir fyrirtækið DoorDash og var með stóra drauma um það að opna sitt eigið fyrirtæki að söng DiCello.