Gotabaya Rajapaksa, forseti Srí Lanka, hélt til flotastöðvar í dag með það fyrir augum að flýja eyjuna með skipi, eftir að tilraun til að fljúga frá flugvellinum mistókst.

Öllum farþegum var á mánudaginn gert að fara í gegnum opinbera innritun á alþjóðaflugvellinum í Srí Lanka. Forsetinn og fylgdarlið hans fóru ekki í gegnum þá leið af ótta við viðbrögð almennings og misstu þar af leiðandi af fjórum flugferðum til Dúbaí.

Tilraunir til að skipuleggja herflug mistókust einnig þar sem rými til lendingar var ekki tiltækt strax. Gistu forsetahjónin á flugherstöð við hliðina á flugvellinum í nótt. Hópurinn yfirgaf herstöðina síðdegis í dag í tveimur þyrlum á leið til hafnar í Trincomalee.

Besti kosturinn að fara með skipi

Háttsettur heimildarmaður í varnarmálum sagði besta kostinn vera að fara úr landi með skipi og er það nú til umræðu. „Hann gæti farið til Maldíveyja eða Indlands og fengið flug til Dúbaí.“

Forsetinn hefur lofað að segja af sér á miðvikudag í kjölfar víðtækra mótmæla gegn honum en tugþúsundir mótmælenda réðust á forsetabústaðinn á laugardaginn.

Sem forseti nýtur Rajapaksa friðhelgi gegn handtöku og talið er að hann vilji fara úr landi áður en hann lætur af embætti til að forðast möguleikann á varðhaldi.

Frétt af mbl.is

Telja forsetann ætla að flýja til Dúbaí

Tengdar fréttir

Mótmæli á Srí Lanka

Nýr forseti kjörinn í stað þess útskúfaða

• Tortímandinn frá Srí Lanka
• Nýr forseti kjörinn á miðvikudag
• Forsetinn yfirgefur Maldíveyjar eftir mótmæli
• Réðust inn á skrifstofu forsætisráðherrans

» Fleiri tengdar fréttir

• Blogga um frétt