Erlent | AFP | 14.7.2022 | 10:58

Hitabylgjan nái hámarki í dag

Drengur kæliir sig niður í gosbrunni í borginni Toulouse í suðurhluta Frakklands. AFP/Valentine Chapuis

Búist er við því að hitabylgjan sem hefur gengið yfir suðvesturhluta Evrópu að undanförnu nái hámarki á Spáni í dag.

„Í dag búumst við við heitasta deginum í þessari hitabylgju,“ sagði spænska veðurstofan.

Vara við miklum hita á Spáni

Spáð er 40 stiga hita í dölunum í kringum þrjár stórar ár, Guadiana, Guadalquivir og Tagus.

Hitinn fór í 45,6 stig

Í gær var varað við miklum hita, sérstaklega í héraðinu Andalúsíu í suðri, Extremadura í suðvestri og Galicia í norðvestri. Fólk var hvatt til að drekka nóg af vatni, vera léttklætt og halda sig í skugga eða þar sem loftkæling er til staðar.

Hitinn fór upp í 45,6 stig í borginni Almonte í Andalúsíu í gær.

Þyrstur verkamaður í Frakklandi. AFP/Valentine Chapuis

Í vesturhluta Spánar, skammt frá landmærunum við Portúgal hafa miklir skógareldar geisað og hafa þeir að minnsta kosti náð yfir 3.500 hektara svæði.

Nýtt met í Bretlandi?

Búist er við því að hitastigið á Spáni lækki undir lok vikunnar en að hitabylgjan haldi áfram í gegnum Frakkland og Bretland.

Stjórnvöld í London hafa gefið út næsthæsta viðvörunarstigið vegna hitans. Talið er mögulegt að hitamet verði slegið í Bretlandi á næstunni. Það hæsta til þessa mældist í Cambridge 25. júlí 2019, 38,7 stig.

Franskar veðurstofur hafa einnig varað við umtalsverðum hita frá sunnudegi til þriðjudags og að hitinn geti á þessum tíma farið upp í 40 gráður.

Skógareldar hafa einnig geisað í suðvesturhluta Frakklands og náð yfir 3.700 hektara svæði.