542.000 króna leigubíll

Verk­fall starfs­fólks skandi­nav­íska flug­fé­lags­ins SAS teyg­ir anga sína og áhrif víða og varð til þess að banda­rísk fjöl­skylda í sigl­ingu um norska firði tók leigu­bíl 1.350 kíló­metra, frá Tromsø í Nor­egi til finnsku höfuðborg­ar­inn­ar Hels­inki, einu færu leiðina til að kom­ast í flug heim til Bost­on.

„Ég var bú­inn að vera í stans­lausu sam­bandi við út­gerð skemmti­ferðaskips­ins í tvo daga til að finna leið til að koma okk­ur til Hels­inki, en þaðan bár­ust fá svör,“ seg­ir Ben MacGraw í sam­tali við norsku viðskiptaf­rétt­asíðuna E24, þá ný­kom­inn úr sigl­ingu með föður sín­um, Will­ard MacGraw og konu föður­ins, Cynt­hiu Clark.

Að lok­inni sigl­ingu um ann­áluðustu firði Nor­egs, sem þekkt­ir eru að kyrrð sinni og nátt­úru­feg­urð, varð dag­ljóst að fjöl­skyld­an frá Bost­on var ekki á leiðinni í flug SAS frá Tromsø til Hels­inki þar sem loka­legg­ur­inn Hels­inki til Bost­on beið þeirra. Ekk­ert varð af flugi SAS vegna verk­falls­ins, ekki fyrsta þrætu­epl­is þessa þó líf­seiga flug­fé­lags sem ein­hvern veg­inn hafn­ar alltaf í nýrri önd­un­ar­vél skandi­nav­ískra rík­is­stjórna þegar skór­inn krepp­ir.

Banda­ríkja­menn­irn­ir íhuguðu ýms­ar flug­leiðir með mis­mörg­um milli­lend­ing­um til að kom­ast tím­an­lega til Finn­lands en allt kom fyr­ir ekki. Kæm­ust þau ekki til Hels­inki á sunnu­dag­inn, í fyrra­dag, yrðu þau að bíða í viku eft­ir næsta flugi til Bost­on.

Þá var fátt í stöðunni annað en að taka leigu­bíl frá Tromsø til Hels­inki, 1.350 kíló­metra leið, og þre­menn­ing­arn­ir létu slag standa. „Ég tók þau upp í bíl­inn hjá mér fyr­ir til­vilj­un við Kiwi-versl­un­ina við Stakk­evoll­veien og sögðu þau far­ir sín­ar ekki slétt­ar,“ seg­ir Roy Astor Han­son, leigu­bif­reiðar­stjóri hjá Tromsø Taxi, í sam­tali við vef­ritið iTromsø.

Náðu sam­komu­lagi

Vel fór aug­ljós­lega um ferðalang­ana í Benz-bif­reið Han­sons þar sem ekki leið á löngu, eft­ir al­mennt kurt­eis­is­hjal, uns þau spurðu hann hvort hann gæti hugsað sér að keyra þau til Finn­lands.

„Ég kvaðst geta orðið við því og við náðum sam­komu­lagi,“ seg­ir Han­sen við iTromsø í sam­tali þar sem hann og ferðamenn­irn­ir eru stödd í Karesu­ando í Finn­landi á föstu­dag­inn í síðustu viku en akst­ur­inn hófst þá um morg­un­inn og reiknaði Han­sen með að vera á áfangastað klukk­an fjög­ur aðfaranótt laug­ar­dags eft­ir 16 stunda akst­ur, það er klukk­an tvö téða aðfaranótt að ís­lensk­um tíma.

Banda­ríska fjöl­skyld­an var til í all­ar aðrar lausn­ir en að fljúga þvers og kruss um Skandi­nav­íu til að kom­ast til Finn­lands. Leigu­bíll frá Tromsø varð lend­ing­in á meðan eng­in lend­ing fæst í verk­fall SAS. Ljós­mynd/Ú​r einka­safni

MacGraw-fjöl­skyld­an seg­ir það aug­ljós­an kost að sitja í Benz-lúx­us­bif­reið í 16 tíma sam­an­borið við að fljúga um alla Skandi­nav­íu til að kom­ast til Finn­lands. „Við fáum líka að sjá land sem við höf­um aldrei séð áður og við hlökk­um til að aka gegn­um Finn­land og sjá það,“ sagði Ben MacGraw fyr­ir helgi og bætti því við að sagt væri að Finn­land minnti á Qu­e­bec í Kan­ada sem þau fjöl­skyld­an hefðu áður heim­sótt.

542.000 króna leigu­bíll

Sjálf­ur hef­ur Han­sen leigu­bíl­stjóri aldrei fengið ann­an eins túr og neitaði hann staðfast­lega að gefa blaðamanni E24 upp stöðuna á gjald­mæl­in­um við kom­una til Finn­lands. Sam­kvæmt út­reikn­ingi áður en lagt var upp hefði akst­ur­inn átt að kosta 40.000 norsk­ar krón­ur, jafn­v­irði tæp­lega 542.000 ís­lenskra, en Han­sen ját­ar að hafa gefið farþegum sín­um „leng­dera­batt“ eða lang­ferðaafslátt. „Við þurf­um held­ur ekki að greiða þenn­an reikn­ing ein, ferðatrygg­ing­in okk­ar stend­ur und­ir hluta af þessu og út­gerð skemmti­ferðaskips­ins greiðir hluta,“ seg­ir Ben MacGraw, talsmaður Banda­ríkja­mann­anna, að lok­um við E24, reynsl­unni rík­ari eft­ir verk­falls­ferð til Skandi­nav­íu.

Han­sen leigu­bíl­stjóri kveðst hins veg­ar ætla að fá sér stutt­an blund áður en hann ekur aft­ur til baka til Tromsø í Nor­egi, aðra 1.350 kíló­metra. „Ef ein­hver vill fá far með mér til Nor­egs er um að gera að hafa sam­band, ég nenni varla að keyra þetta einn,“ seg­ir hann að skilnaði.

E24

Norwaytoday

• Blogga um frétt