Disney-ferð með Icelandair gagnrýnd

Ný „lúxusferð“ Disney, sem farin verður með vél Icelandair í kringum heiminn með viðkomu í öllum Disney-görðum heimsins, hefur hlotið gagnrýni fyrir gríðarlega koltvísýringslosun.

Hver farþegi í ferðinni, sem kostar 110.000 dollara, losar um 6,2 tonn af koltvísýringi. Kemur fram í frétt Guardian að það sé 20 sinnum meira en manneskja í lágtekjulandi losar á einu ári.

Frétt af mbl.is

Disney kynnir 14,5 milljóna ferð með Icelandair

Ferðin, sem er nú þegar uppbókuð, tekur 24 daga og eru farþegarnir 75 talsins. Flogið verður til þriggja heimsálfa með sérstakri Boeing 757-vél á vegum íslenska flugfélagsins Icelandair.

Greining frá samtökunum Transport & Environment leiddi í ljós að flugvélaeldsneyti sem þarf að brenna til að knýja flugvélina þessa 31.500 km sem ferðin fer myndi samtals losa 462 tonn af koltvísýringi eða 6,2 tonn á hvern farþega.

Langt yfir meðaltali á mann

Árið 2019 var meðaltal koltvísýringslosunar á mann á ári í lágtekjulandi 0,3 tonn, samkvæmt gögnum sem Alþjóðabankinn hefur safnað. Á heimsvísu var talan 4,5 tonn á mann.

Frétt af mbl.is

Mjög eftirsóknarvert að vera í áhöfninni

Talsmaður Disney sagði fyrirtækið hafa skuldbundið sig til að vernda jörðina og að það myndi fylgjast með losun ferðarinnar og koma jafnvægi á hana með fjárfestingum í loftslagslausnum sem myndu leiða til minni losunar.

Loftslagsaðgerðasinnar hafa bent á að ferðin varpi ljósi á hversu hátt hlutfall koltvísýringslosunar kemur frá efnameiri einstaklingum. Ein rannsókn benti á að það 1% flugfarþega, sem flýgur mest, bæri ábyrgð á helmingi losunar koltvísýrings í flugiðnaðinum árið 2018.

• Blogga um frétt