Erlent | AFP | 28.7.2022 | 19:02

Þjóðverjar slökkva ljós og fara í kaldar sturtur

Hitabylgjan sem gengur yfir Evrópu hefur eflaust hjálpað mörgum við að taka kaldar sturtur. AFP/Tobias Schwarz

Yfirvöld í Þýskalandi hafa gripið til ýmissa ráða í viðleitni til að draga úr orkunotkun þjóðarinnar vegna hótana Rússlands um að skerða enn frekar afhendingu gass til landsins.

Slökkt hefur verið á ljósum sem lýsa upp sögulegar byggingar og minnisvarða í höfuðborginni Berlín og munu yfir 200 kennileiti standa í myrkrinu að næturlagi á næstu fjórum vikum, þar á meðal ráðhúsið og ríkisóperuhúsið.

Frétt af mbl.is

Ráðherrar hittast til að minnka gasnotkun í Evópu

þá hafa borgaryfirvöld í Hannover tilkynnt að einungis verði boðið upp á kalt vatn í sturtunum í almenningssundlaugum og -íþróttamiðstöðvum.

„Í ljósi stríðsins og hótana Rússa um skerðingu á orkuafhendingu, er mikilvægt að við förum eins sparlega með orkuna okkar og mögulegt er,“ sagði Bettina Jarasch, yfirmaður umhverfismála borgarinnar, í dag.

Sagði hún skilaboðin eiga við um alla, almenna neytendur, opinberar stofnanir og stóriðnaiðnaðinn.

Draga úr afhendingu

Rússneski orkurisinn Gazprom hyggst draga úr útflutningi gass til Evrópuríkja en eins og greint hefur verið frá hefur fyrirtækið nú þegar minnkað orkuafhendingu til Evrópuríkja töluvert. Í byrjun júlí hafði til að mynda engu rússnesku gasi verið dreift til Þýskalands í gegnum Nord Stream-gasleiðsluna í tíu daga í röð.

Orkusparnaðarátak er hafið í Þýskalandi ekki síður vegna himinhás verðlags á gasi vegna stríðsins í Úkraínu. Evrópusambandið samþykkti fyrr í vikunni að minnka notkun á rússnesku gasi í öllum sambandsríkjum.