Bandaríkin funduðu með sendiherra Kína

Hvíta húsið fundaði með sendiherra Kína, Qin Gang, í gær vegna viðbragða Kína við heimsókn Nancy Pelosi, forseta fulltrúardeildar Bandaríkjaþings, til Taívan.

„Við fordæmum hernaðaræfingar Kína, sem eru óskynsamlegar, þar sem þær fara á skjön við langtíma markmið okkar sem er að viðhalda friði og stöðugleika,“ segir John Kirby, talsmaður bandaríska varnarmálaráðuneytisins, í yfirlýsingu.

Frétt af mbl.is

Kína slítur samstarfi við Bandaríkin

Kirby segir að Bandaríkin hafi ekki breytt afstöðu sinni hvað varðar „eitt Kína“ og var sendiherranum gert grein fyrir því. Bandaríkjamenn viðurkenni afstöðu Kína sem felst í því að Taívan sé hluti af þeirra yfirráðasvæði og það velti á Taívan og Kína að finna friðsamlega lausn á deilum þeirra.

Kína hefur haldið því streitulaust fram að Taívan sé hluti af Kína á meðan Taívan er á öndverðri skoðun.

Kirby greindi ekki frá hverjir sóttu fundinn fyrir hönd Bandaríkjanna.

Hernaðaræfingar kínverska hersins standa nú yfir á hafsvæði umhverfis Taívan. AFP

• Blogga um frétt