Erlent | mbl | 13.8.2022 | 0:07 | Uppfært 9:00

Mun líklega missa auga eftir árásina

Rushdie var fluttur á sjúkrahús í Philadelphiu eftir árásina. AFP/Horatio Gates

Rithöfundurinn Salman Rushdie er nú í öndunarvél í kjölfar skurðaðgerðar, sem gerð var til þess að bjarga lífi hans eftir hnífsstunguárásina fyrr í dag. Umboðsmaður Rushdies segir að rithöfundurinn geti ekki talað, og að hann muni líklega missa annað augað eftir árásina.

Frétt af mbl.is

Rushdie stunginn á sviði í New York

Andrew Wylie, umboðsmaður Rushdies, sagði við breska ríkisútvarpið BBC að útlitið væri ekki gott. „Salman mun líklega missa annað auga, taugarnar í handlegg hans skárust í sundur og lifrin hans varð fyrir stungu og skaddaðist,“ sagði Wylie.

Ríkislögreglan í New York-ríki greindi frá því fyrr í kvöld að hún hefði handtekið 24 ára gamlan mann, Hadi Matar, fyrir árásina en hann er frá bænum Fairview í New Jersey. Enn er ekki búið að komast að því hver ástæða árásarinnar var, en Rushdie hefur mátt þola líflátshótanir af hálfu íslamista í rúma þrjá áratugi eftir að Khomeini, þáverandi erkiklerkur Írans, lýsti yfir dauðadómi á hendur honum fyrir bókina Söngva Satans.