Myrti mann eftir að hafa þóst vera í vanda

Kona sem þóttist vera ráðvillt og týnd skaut 22 ára mann til bana í þjóðgarði í Alabama í Bandaríkjunum. 

Maðurinn, Adam Simjee, var ásamt kærustu sinni Mikaylu Paulus að keyra í þjóðgarðinum Talladega, skammt frá borginni Birmingham, að morgni sunnudagsins 14. ágúst.

Önnur kona, Yasmine Hider, fékk þau þá til að stöðva bílinn og tjáði þeim að bíll hennar færi ekki í gang.

Talin hafa haldið til í tjaldi í þjóðgarðinum

Þegar parið nálgaðist hana dró hún fram byssu og leiddi þau tvö inn í skóg, en þá dró Simjeee sjálfur fram byssu sem varð til þess að hann og Hider hleyptu bæði af skotum.

Hider var skotin nokkrum sinnum í kviðinn en Simjee nokkrum sinnum í bakið.

Unnusta Simjee reyndi að endurlífga kærasta sinn án árangurs og lét hann lífið skömmu síðar. Hider var flutt á spítala í Birmingham þar sem hlúð var að sárum hennar.

Talið er að Hider hafi tilheyrt hópi sem heldur til í tjöldum í þjóðgarðinum og dæmi eru um að fólk í hópum sé vopnað og mögulega hættulegt, samkvæmt því sem lögregluyfirvöld í Birmingham hafa gefið út.

Hider verður ákærð fyrir mannrán, rán og morð, að því er fram kemur í umfjöllun New York Times.

• Blogga um frétt