Myrtur skömmu eftir færslu á Facebook

Blaðamaður var skotinn til bana í suðurhluta Mexíkó seint í gær, stuttu eftir að hafa skrifað færslu á Facebook um hvarf 43 kennaranema fyrir átta árum á nærliggjandi svæði.

Frétt af mbl.is

Allt á suðupunkti í Mexíkó

Fredid Roman, sem skrifaði í dagblað og birti efni á ýmsum samfélagsmiðlum, fannst látinn í bíl sínum í borginni Chilpancingo, höfuðborg Guerrero-ríkis, að sögn embættis saksóknara í ríkinu.

Lögreglan skammt frá svæðinu þar sem blaðamaðurinn fannst látinn. AFP

Mál 43 nemenda frá Guerrero sem hurfu árið 2014 eftir að hafa tekið yfir strætisvagn á leiðinni í mótmæli er talið einn versti mannréttindaharmleikur í sögu Mexíkó.

Málið komst aftur í fréttirnar í síðustu viku þegar sannleiksnefnd sagði verknaðinn „ríkisglæp“ sem fólk úr ýmsum stofnunum hafi komið að.

Frétt af mbl.is

Játa að hafa myrt 17 nemendur

Nokkrum klukkustunum áður en hann lést birti Roman langa færslu á Facebook undir fyrirsögninni „Ríkisglæpur án þess að ákæra höfuðpaurinn“. Þar talaði hann um meintan fund fjögurra embættismanna á svipuðum tíma og kennaranemarnir hurfu, þar á meðal fyrrverandi dómsmálaráðherrann Jesus Murillo Karam.

• Blogga um frétt