Strandaglópar inni í göngunum

Tugir manna sátu fastir í margar klukkustundir inni í Ermarsundsgöngunum eftir að lest á leið frá frönsku borginni Calais til enska bæjarins Folkstone virtist hafa bilað.

Í myndefni sem var birt á netinu sást þegar farþegar með Le Shuttle, sem flytur bíla, mótorhjól og fleiri faratæki í gegnum göngin, þurftu að yfirgefa faratæki sín og fara í gegnum neyðarþjónustugöng. Farþegarnir voru síðar fluttir með annarri lest í gegnum Ermasundsgöngin og á áfangastað, að því er BBC greinir frá.

Að sögn Le Shuttle fór neyðarvarnarkerfi lestarinnar af stað, sem þurfi að rannsaka betur.

„Þjónustugöngin voru hryllileg,“ sagði Sarah Fellows við PA-fréttastofuna, eftir atvikið í gærkvöldi.

„Þetta var eins og í stórslysamynd. Maður gekk bara í gegnum hyldýpið án þess að vita hvað væri að gerast. Við þurftum öll að bíða undir sjónum í þessari löngu röð.

„Ein kona var grátandi í göngunum og önnur kona sem var ein á ferð fékk kvíðakast,“ sagði hún. 

• Blogga um frétt