Erlent | AFP | 25.8.2022 | 20:05

Stærsta kjarnorkuver Evrópu aftengt

Alþjóðaorkumálastofnunin sendir eftirlitsaðila að kjarnorkuverinu á næstu dögum. AFP

Kjarnorkuverið í Saporisjía í Úkraínu var í dag aftengt frá úkraínska rafveitukerfinu í fyrsta sinn síðan það var reist, fyrir um fjörutíu árum síðan.

Alþjóðakjarnorkumálastofnunin mun senda eftirlitsteymi að verinu innan fárra daga. Skemmdir hafa orðið á raflínum úkraínska rafveitukerfisins og því brýnt að tryggja öryggi versins.

Sinnir um 20% af raforkuþörfinni

Úkraínska kjarnorkumálastofnunin Energoatom segir í tilkynningu að tveir af sex kjarnaofnum sem enn eru í notkun séu ekki lengur tengdir við orkunetið, eftir að eldsvoði í nálægu kolaveri eyðilagði síðustu rafmagnslínuna sem tengdi verið við kapalinn. Hinum þremur línunum var grandað í stórskotahríð Rússa.

Sakar Energoatom Rússa um að hafa valdið aftengingunni. Segja forsvarsmenn stofnunarinnar að nú sé verið að reyna að tengja annan ofninn aftur við raforkunetið.

Verið sinnir um 20% af raforkuþörf Úkraínu en einnig þarf rafmagnstengingu til að kæla kjarnaofnana sem eru í notkun. Nokkrir rafalar sem ganga fyrir díselolíu eru við verið en spurningar hafa vaknað um áreiðanleika þeirra.

Úkraínskir embættismenn hafa áður sagt að Rússar hafi í hyggju að aftengja verið frá orkuneti landsins og beina orkunni sem verið framleiðir til Krímskaga. Energoatom getur þó ekki staðfest hvort það hefði verið gert.

Vara Rússa við

Bandarísk yfirvöld hafa í kjölfar aftengingarinnar varað Rússa við því að beina orku versins til síns heimalands, í stað þess að hún fari til heimamanna í Úkraínu.

Rússneskir hermenn hernumdu kjarnorkuverið, sem er það stærsta í Evrópu, í byrjun innrásar sinnar sem hófst í febrúar síðastliðnum.

Bardagar milli hersveita Rússa og Úkraínumanna hafa verið tíðir umhverfis kjarnorkuverið.