Friðargæsluliðar sakaðir um að skemma sæketti

Friðargæslulið Sameinuðu þjóðanna á Kýpur rannsakar nú ásakanir um að breskir friðargæsluliðar hafi eyðilagt tvo sæketti (e. jet ski) í síðustu viku.

Bretarnir höfðu leigt tækin frá vatnaíþróttamiðstöð, sem þeir klesstu tvisvar með þeim afleiðingum að þau sukku.

Samkvæmt tyrkneskum miðlum hljóðar áætlað tjón og tekjutap upp á 13.000 dollara, eða tæpar tvær milljónir íslenskra króna.

Beri ábyrgð á hegðun sinni

Talsmaður friðargæsluliðsins segir að þau séu meðvituð um ásakanirnar og rannsaki nú atvikið. Allir friðargæsluliðar verði að uppfylla ströngustu hegðunarkröfur og beri ábyrgð á hegðun sinni.

Friðargæsluliðið á Kýpur var stofnað árið 1964 og er eitt elsta friðargæsluverkefni Sameinuðu þjóðanna. Starfa þar nú um 800 friðargæsluliðar.

• Blogga um frétt