Franska orkufyrirtækið Engie greindi frá því í morgun að rússneski orkurisinn Gazprom hafi ákveðið að draga úr afhendingu á gasi „vegna ósamkomulags á milli beggja aðila um framkvæmd samninga“.

Engie sagði í yfirlýsingu að rússneskir gasbirgjar hafi þegar dregið mjög úr afhendingu gass eftir að Rússar réðust inn í Úkraínu í febrúar.

„Engie hefur nú þegar tryggt nauðsynlegt magn til að tryggja birgðir fyrir viðskiptavini sína og fyrir eigin þarfir,“ sagði í yfirlýsingunni.

Rússneskt gas nam fjórum prósentum af öllum orkubirgðum franska fyrirtækisins í lok júní.

Lógó rússneska orkurisans Gazprom. AFP/Olga Maltseva

Ríkisstjórn Frakklands hefur lýst yfir áhyggjum síðustu daga af mögulegum erfiðleikum í vetur vegna orkuskorts og mikillar verðbólgu.

Mörg Evrópuríki standa frammi fyrir miklum vandamálum vegna hugsanlegs orkuskorts eftir að Rússar hafa skrúfað fyrir gas til að bregðast við diplómatískum- og hernaðarlegum stuðningi Evrópusambandsins við Úkraínu.

Emmanuel Macron Frakklandsforseti ætlar að hitta ráðherra landsins á sérstökum ríkisstjórnarfundi á föstudag til „undirbúnings fyrir alla möguleika í haust og í vetur“, sagði skrifstofa hans.

Forsætisráðherra Frakklands, Elisabeth Borne, hvatti yfirmenn fyrirtækja í gær til að draga úr neyslu og varaði hún jafnframt við hættunni á orkuskömmtun í landinu.

Tengdar fréttir

Úkraína

Rússar réðust á orkuinnviði á jóladag

• Segja Norður-Kóreumenn hafa haft lítil áhrif
• Norðurkóreskir hermenn drepnir í stríði Rússa
• Sammála um að koma þurfi á „varanlegum friði“
• Norðurkóreskir hermenn felldir í Evrópu

» Fleiri tengdar fréttir

• Blogga um frétt