Hringdi í leyni í neyðarlínuna á salerninu

Paul Pelosi, eiginmaður Nancy Pelosi sem er forseti fulltrúadeildar Bandaríkjaþings, er nú á batavegi eftir að hafa gengist undir aðgerð vegna fólskulegrar árásar þegar brotist var inn á heimili hjónanna í gærmorgun.

Samkvæmt BBC sló árásarmaðurinn Pelosi með hamri með þeim afleiðingum að hann höfuðkúpubrotnaði. Þá hlaut hann einnig áverka á hægri handlegg og höndum. Búist er við að hann nái fullum bata.

Frétt af mbl.is

Pelosi varð fyrir fólskulegri árás

Vildi ræða við Nancy

David Depape, maðurinn sem liggur undir grun, er sagður hafa brotist inn á heimili þeirra og krafist þess að ræða við Nancy Pelosi, sem var þó ekki heima. Paul Pelosi brá þá á það ráð að biðja um að fá að nota salernið. Þegar þangað var komið hringdi hann í neyðarlínuna með farsímanum. 

Þegar lögreglu bar að garði voru Paul Pelosi og árásarmaðurinn að berjast um hamarinn en sá síðarnefndi hafði betur og sló Pelosi í höfuðið.

Lögreglan afvopnaði manninn og handtók hann. Honum var síðar komið undir læknishendur á spítala en lögreglan hefur ekki gefið upp um líðan mannsins.

• Blogga um frétt