Sakar Kínverja um afskipti af kosningum

Justin Trudeau forsætisráðherra Kanada hefur sakað Kínverja um tilraunir til þess að hafa afskipti af kosningum í Kanada. 

BBC greinir frá.

Trudeau sakaði stjórnvöld í Peking um „árásagjarna tilburði“ gagnvart lýðræðinu og að gera kanadískar stofnanir að skotmörkum sínum. 

Kanadískir fjölmiðlar hafa að undanförnu greint frá því að þarlend leyniþjónusta hafi borið kennsl á net frambjóðenda sem njóta stuðnings kínverskra stjórnvalda. 

Ellefu frambjóðendur hið minnsta nutu stuðnings Kínverja í þingkosningunum árið 2019 í Kanada samkvæmt rannsókn leyniþjónustunnar að sögn Trudeaus. 

Kanadískir miðlar hafa, með vísan í ónefnda leyniþjónustustarfsmenn, greint frá því að kínversk stjórnvöld hafi greitt háar fjárhæðir til frambjóðenda sem einnig höfðu kínverska ráðgjafa í starfsliði sínu. 

Í einu tilviki er til að mynda um að ræða greiðslu upp á 250 þúsund kanadadali til framboðsskrifstofu þingmanns í Ontario. Það jafngildir um 27 milljónum króna. 

Þá er fullyrt að aðgerðum kínverskra stjórnvalda hafi verið stýrt frá ræðisskrifstofunni í Torontó, þar sem einnig hafi verið lögð áhersla á að koma starfsfólki fyrir í starfsliði þingmanna til að hafa áhrif á stefnumótun.

• Blogga um frétt