„Jólunum er aflýst“
Setja bókamerki
Að minnsta kosti tíu manns hafa látið lífið í Bandaríkjunum frá því á miðvikudaginn í þeim ískulda og stífu vindátt sem verið hefur ráðandi veðurástand í flestum ríkjum landsins síðustu daga en kaldast varð í Montana í gær þegar frost þar fór niður í -45,6 gráður á selsíuskvarða.
Þá hafa samtals yfir milljón íbúar nokkurra ríkja verið án rafmagns síðan í gær auk þess sem Kanadabúar glímdu við það sama, þar voru 260.000 manns án rafmagns í gær í fylkjunum Quebec og Ontario.
Miklar truflanir hafa orðið á öllum samgöngum, hvort sem er á vegum, teinum eða í lofti, í New York ollu flóð því að Long Island-lestin hætti að ganga og mörg þúsund flugferðum hefur verið aflýst síðustu daga með tilheyrandi afleiðingum fyrir Bandaríkjamenn sem ætluðu sér að vera á faraldsfæti um hátíðina.
Mannskæð umferðarslys víða
„Jólunum er aflýst,“ hefur fréttastofa CNN eftir Mick nokkrum Saunders, íbúa í Buffalo í New York-ríki sem átti við að fjölskyldan hefði hætt við að koma saman þessi jólin. „Öll fjölskyldan og vinir mínir eru á því að það sé öruggast,“ segir Saunders enn fremur.
Í Kansas létust þrír í þremur umferðarslysum á miðvikudagskvöldið, einu veðurtengdu og tveimur líklega veðurtengdum en rannsókn á eftir að leiða það í ljós. Aðrir þrír týndu lífinu í Kentucky, tveir þeirra í umferðarslysum og sá þriðji varð úti. Fjögur dauðsföll urðu svo í Ohio í umferðarslysum sem lögregla segir öll tengjast óveðrinu.
Ískalt loftið teygir sig alla leið að strönd Mexíkóflóa og landamærum Mexíkó og Bandaríkjanna og við austurströndina lifa íbúarnir nú köldustu jól í marga áratugi.
Stóðu skógarþjófa að verki
Ný ríkisstjórn kynnt á morgun
Ók á hóp fólks á jólamarkaði: Einn látinn
Forstjóri bendir á ábyrgð birgja vegna verðhækkana
Funda með þingflokkum
Lát hjóna í Neskaupstað: Ákæra gefin út
„Mér finnst gamla Samfylkingin komin aftur“
