Erlent | mbl | 8.1.2023 | 10:59

Kennarinn á batavegi eftir skotárás nemanda

Kennslukonan sem varð fyrir skotárás frá nemanda sínum er 25 ára gömul og heitir Abby Zwerner. Facebook/Abby Zwerner

Kennslukonan sem var skotin af sex ára nemanda sínum í grunnskóla í Virginíu í Bandaríkjunum á föstudag, er á batavegi. Hún er engu að síður enn í alvarlegu ástandi.

BBC greinir frá, en kennslukonan heitir Abby Zwerner og er á þrítugsaldri. Batakveðjum hefur rignt yfir hana á samfélagsmiðlum.

Frétt af mbl.is

Sex ára nemandi skaut kennara sinn

Öskraði til barnanna að koma sér burt

Sex ára drengur, nemandi í fyrsta bekk, skaut kennara sinn á föstudaginn, eftir að til ósættis kom milli þeirra. Lögregla hefur gefið það út að ekki hafi verið um slys að ræða heldur ásetning drengsins.

Atvikið átti sér stað í miðri kennslustofu, að bekkjarsystkinum drengsins ásjáandi. Zwerner er sögð hafa öskrað á börnin að koma sér í burtu með hraði, eftir að hún var skotin.

Óljóst er hvernig drengurinn komst yfir skammbyssuna, sem hann notaði til verksins. Einnig er óljóst hvernig hann kom henni óséðri inn í skólann og hvernig honum tókst að beita henni. Í grunnskólanum eru málmleitartæki notuð til þess að skima nemendur daglega, að handahófi.

Abby Zwerner is the first grade teacher who was shot by her 6-year-old student yesterday.

She has life threatening injuries.

Ms. Zwerner allegedly told her students to “run” when she was shot.

Our teachers deserve better than this.

Our students deserve better than this. pic.twitter.com/fRdIuEpHgz
— Newtown Action Alliance (@NewtownAction) January 7, 2023

Alvarleg áminning fyrir Bandaríkin

Skólinn er kenndur við Richneck, en hann er staðsettur í borginni Newport, og í honum eru 550 nemendur á yngsta skólastigi. Í borginni búa um 180 þúsund manns.

Lögreglan hefur ekki viljað tjá sig um það hverjar hvatir drengsins voru.

„Þetta er myrkur dagur í sögu okkar og þetta er alvarleg áminning fyrir landið allt,“ sagði boegarstjórinn á blaðamannafundi vegna málsins.

Í Virginíu er ekki hægt að ákæra barn með sama hætti og fullorðna einstaklinga, en drengurinn var handtekinn á vettvangi og hefur verið í haldi lögreglu frá því á föstudag.

Drengurinn er jafnframt of ungur til þess að hægt sé að senda hann í svokallað „æskulýðsfangelsi.“ Aftur á móti væri hægt að svipta foreldra hans forræði yfir honum og finna honum nýtt heimili með hjálp velferðarkerfisins.