Að minnsta kosti fimm eru látnir og 27 særðir eftir loftárás Rússa á níu hæða blokk í úkraínsku borginni Dnípró í austurhluta Úkraínu. 

Valentyn Reznichenko, ríkisstjóri Dnipropetrovsk, greindi frá þessu í dag á Telegram. Sex börn eru á meðal særðu að sögn hans. 

Gert á hátíðisdegi

Vladimír Selenskí Úkraínuforseti minntist fórnarlambanna á Twitter í dag og lagði áherslu á að Úkraínumenn berjist fyrir hverju einasta mannslífi og að Rússar verði dregnir til ábyrgðar.

Úkraínumenn fögnuðu nýju ári í dag og er hefðin þar í landi að börn fái sætindi þann 13. janúar. „Rússnesk voðaverk halda áfram yfir hátíðarnar. Á meðan úkraínsk börn njóta sætindanna sem þau fengu í gær gera Rússar loftárásir á íbúðarhúsnæði,“ sagði Olena Zelenska, forsetafrú Úkraínu.