Volodimír Selenskí Úkraínuforseti varar við því að Rússar séu að byggja upp herlið sitt og þeir ætli að „hefna sín“ á Vesturlöndum.
Ummælin lét hann falla á blaðamannafundi í Kænugarði, höfuðborg Úkraínu, ásamt Ursulu von der Leyen, forseta framkvæmdastjórnar ESB. Hún sagði sambandið vera að leggja lokahönd á nýjar refsiaðgerðir gagnvart Rússum vegna innrásar þeirra í Úkraínu fyrir tæpu ári síðan.
„Rússar eru að þétta raðir hersveita sinna. Við vitum það öll. Þeir eru að búa sig undir að hefna sín, ekki bara á Úkraínu, heldur á frjálsri Evrópu í heild sinni og hinum frjálsa heimi,“ sagði Selenski á blaðamannafundinum.
Vladimír Pútín Rússlandsforseti minnist þess í borginni Volgograd í dag að 80 er ár eru liðin síðan Sovétmenn sigruðu Þjóðverja í borginni Stalíngrad. Hann segir að Rússar ætli að halda áfram aðgerðum sínum í Úkraínu og að refsiaðgerðir Vesturlanda hafi lítið að segja.
Von der Leyen sagði aftur á móti refsiaðgerðirnar hafa þegar valdið usla þegar kemur að efnahag Rússalands og þær hafi „ýtt honum aftur um eina kynslóð“. Reiknaði hún með því að eingöngu verðþakið sem er á olíu kosti Rússa um 160 milljónir evra á hverjum einasta degi, eða um 25 milljarða króna.
Hún bætti við að nýjar refsiaðgerðir, þær tíundu í röðinni, verði kynntar áður en ár verður liðið frá innrásinni, 24 febrúar.