Erlent | AFP | 7.2.2023 | 19:27

Meira en 7.100 manns hafa látist

Rússneskir björgunarmenn eru hér í bænum Jableh í Sýrlandi að leita fólks í rústum byggingar. AFP

Björgunarmenn í Tyrklandi og Sýrlandi börðust við nístandi kuldann í dag í kapphlaupi við tímann um að finna fólk á lífi í rústunum eftir jarðskjálftana sem hafa nú þegar kostað 7.100 manns lífið í Tyrklandi og Sýrlandi.

Yfirvöld segja að mannfallið sé nú komið í 5.434 manns í Tyrklandi og í Sýrlandi er sagt að 1.712 manns hafi látist.

Frétt af mbl.is

Enn skelfur jörð í Tyrklandi

Skjálftarnir gengu yfir á svæði sem þegar er illa statt vegna stríðsátaka. Á götunni stóðu þeir sem komust úr hrynandi byggingum í kuldanum þar sem þau brenndu rusl til að reyna að halda á sér hita þar til alþjóðleg aðstoð bærist.

Ljós í myrkrinu

En kraftaverkin hafa líka gerst. Nýfætt barn var dregið lifandi úr rústum í Sýrlandi, enn tengt móður sinni með naflastrengnum, en hún hafði látið lífið á mánudag. „Við heyrðum grát meðan við vorum að grafa,“ sagði Khalil al-Suwadi, ættingi konunnar, í samtali við AFP-fréttastofuna. „Við hreinsuðum rykið og fundum barnið með naflastrenginn og klipptum á hann og frændi minn fór með hana á sjúkrahús.“

Ungbarnið er ein eftirlifandi ættingi al-Suwadi, en allir aðrir fjölskyldumeðlimir létu lífið í bænum Jindayris.

Þriggja mánaða neyðarástandi lýst yfir

Skjálftinn, sem var 7,8 að stærð, varð á fyrir sólarupprás á mánudagsmorgunn þegar fólk svaf og nú er talið að áhrif skjálftanna muni hafa áhrif á milljónir manna.

Heilu byggingarnar hrundu og mesta eyðileggingin er nærri miðju skjálftans á milli borganna Gaziantep og Kahramansmaras.

Frétt af mbl.is

Afi og amma enn undir rústunum

Hrikalegt ástandið og eyðileggingin af völdum skjálftanna varð til þess að Recep Tayyip Erdogan, forseti Tyrklands, lýsti í dag yfir þriggja mánaða neyðarástandi í tíu héruðum í suðausturhluta landsins.

Íbúar í Kahramanmaras í nístandi kulda bíða og vona að ættingjar þeirra finnist í rústunum. AFP/Ozan Kose

„Börnin eru að frjósa úr kulda“

Tugir þjóða eins og Bandaríkin, Kína og Persaflóaríkin hafa heitið á að leggja hönd á plóginn og leitarsveitir og hjálpargögn eru byrjuð að berast með flugvélum.

Samt sagði fólk á sumum af þeim svæðum sem urðu hvað harðast úti að þeim fannst eins og það væri algjörlega á eigin vegum.

„Ég næ ekki bróður mínum aftur úr rústunum. Ég næ ekki bróðursyni mínum. Líttu í kringum þig hérna. Hér er enginn embættismaður ríkisins, í guðanna bænum,“ sagði Ali Sagiroglu í tyrknesku borginni Kahramanmaras.

„Í tvo daga höfum við ekki séð neinn frá yfirvöldum hérna í kring... Börnin eru að frjósa úr kulda,“ bætti hann við.