Vill að lestarslysið verði sett í forgang

Kyriakos Mitsotakis, forsætisráðherra Grikklands, hefur farið fram á að þau mál er tengjast mannskæða lestarslysinu í síðustu viku, verði sett í algjöran forgang hjá hæstarétti landsins.

57 létu lífið þegar farþega­lest og flutn­inga­lest skullu sam­an á þriðjudaginn í síðustu viku. Slysið hefur vakið upp mikla reiði meðal almennings í landinu sem segja stjórnvöld bera ábyrgð á lélegum lestarsamgöngum. Hávær mótmæli hafa staðið yfir vegna slyssins og hafa átök brotist út milli lögreglunnar og mótmælenda. 

Lest­ar­stöðvar­stjóri sem var á vakt þegar slysið varð hef­ur viður­kennt ábyrgð í málinu. Þá hefur samgönguráðherra Grikklands sagt af sér.

Frétt af mbl.is

Stöðvarstjórinn viðurkennir afdrifarík mistök

Frétt af mbl.is

Enn brjótast út átök milli mótmælenda og lögreglu

Ítarlega skýringu

„Gríska þjóðin vill skjóta og ítarlega skýringu á þeim glæpsamlegu athæfum er tengjast þessu hörmulega slysi,“ segir í bréfi sem Mitsotakis skrifaði til saksóknara við hæstarétt.

Tók hann fram í bréfinu að rannsókn saksóknara væri aðskilin þeirri sem að sérfræðingar á vegum stjórnvalda stæðu fyrir.

Mitsotakis bað í gær fjölskyldur fórnarlamba slyssins um fyrirgefningu. Í færslu á Face­book-síðu sinni sagði hann að ekki væri í lagi árið 2023 að tvær lest­ir keyrðu á sömu tein­un­um án þess að nokk­ur tæki eft­ir því. 

• Blogga um frétt