85% af starfsfólki Virgin Orbit sagt upp

Eldflaugafyrirtæki breska auðjöfursins Sir Richards Bransons, Virgin Orbit, ætlar að segja upp um 85% af starfsfólki sínu eftir að hafa mistekist að tryggja aukið fjármagn í reksturinn.

Fyrirtækið mun einnig hætta starfsemi um ófyrirsjáanlega framtíð, að því er BBC greinir frá. 

Nokkrar vikur eru síðan fyrirtækið gerði hlé á starfsemi sinni á meðan það reyndi að laga fjármálin.

Fyrr á þessu ári mistókst eldflaug á vegum Virgin Orbit að koma gervihnöttum á sporbaug um jörðu. 

Hlutabréf í fyrirtækinu féllu um rúm 44% seinnipartinn í gær.

Uppsagnirnar munu hafa áhrif á um 675 starfsmenn þess.

• Blogga um frétt