Tveir látnir eftir að loftbelgur varð alelda

Tveir létust og ein stúlka slasaðist þegar að eldur kom upp í loftbelg nálægt Mexíkóborg í Mexíkó í gær. Slysið varð á vinsælum stað fyrir ferðir með loftbelg en þau látnu voru 50 ára karlmaður og 38 ára kona.

Fréttastofa ABC greinir frá þessu.

Af myndefni af atvikinu, sem var dreift á samfélagsmiðlum, að dæma stukku eða duttu farþegar loftbelgsins úr honum eftir að eldur kom upp. Stúlkan sem lifði slysið af þjáist af brunasárum og handleggsbroti.

Slysið átti sér stað nálægt rústum Teotihuacan-borgar rétt norðan við Mexíkóborg. Svæðið er vinsæll ferðamannastaður og er algengt að fólk fari í ferðir með loftbelg á svæðinu. Óvíst er hvað olli slysinu enn sem komið er en lögregla á svæðinu rannsakar nú málið.

• Blogga um frétt