Erlent | AFP | 3.4.2023 | 14:20

Rússar tjá sig ekki um stöðuna í Bakhmút

Jevgení Prigosjín, stofnandi Wagner-málaliðahópsins, sést hér tjá sig um meintan árangur sinna manna í Bakhmút. AFP

Talsmenn rússneska hersins hafa ekkert tjáð sig um meinta sigra í borginni Bakhmút í austurhluta Úkraínu eftir að liðsmenn Wagner-málaliðanna kváðust hafa náð ráðhúsi borgarinnar á sitt vald.

Baráttan um Bakhmút hefur verið lengsta hernaðaraðgerð Rússa frá því innrásin í Úkraínu hófst.

Jevgení Prigosjín, stofnandi Wagner-málaliðahópsins, sagði á vefnum Telegram í dag að lagalega séð væri Bakhmút undir þeirra stjórn. „Óvinurinn heldur sig í vesturhlutanum,“ sagði Prigosjín.

Í myndskeiði sem fylgir færslunni sést Prigosjín halda á rússneskum fána, sem hann segir að liðsmennWagner-sveitanna muni reisa á ráðhúsi borgarinnar.

Úkraínskir hermenn sjást hér flytja særðan hermann í borginni. Baráttan um Bakhmút hefur staðið yfir í langan tíma. AFP

Talsmenn rússneska varnarmálaráðuneytisins sögðu þó ekkert um málið á daglegum blaðamannafundi sínum í dag.

Aftur á móti segja talsmenn úkraínska hersins að þeim hafi tekist að stöðva árásir Rússa og að borgin sé enn í höndum Úkraínumanna.

Í marga mánuði hefur Prigosjín, sem er bandamaður Pútíns Rússlandsforseta, átt í valdabaráttu við rússneska varnarmálaráðuneytið þar sem hann hefur lýst yfir góðum árangri á vígvellinum áður en rússneskir hermenn mæta á svæðið. Þá hefur hann sakað herinn um að neita að deila skotfærum með málaliðahópnum.