Alls 119 handteknir í „Kökuskrímslisaðgerð“

Samtals hafa verið handteknir 119 manns í tengslum við aðgerð bandarísku alríkislögreglunnar (FBI) kennda við Kökuskrímslið á Sesamstræti (e. Operation Cookie Monster).

Lögregla beindi spjótum sínum að Genesis markaðnum, vefsíðu þar sem tölvuþrjótar gátu keypt stolin auðkenni fólks og lykilorð þess.

Europol segir að glæpamenn hafi í gegnum síðuna getað keypt stafrænar upplýsingar um fólk, svo sem fingraför þeirra, vafrakökur og vistuð lykilorð og aðrar upplýsingar.

Auðkennisupplýsingar tveggja milljón manna höfðu verið seldar í gegnum vefsíðuna. Voru verðmiðarnir allt frá því sem nemur tæpum hundrað krónum íslenskum upp í tugi þúsunda króna.

Vefsíðan hýst í Rússlandi

Verkefnið var leitt af FBI og lögreglunni í Hollandi en lögregluyfirvöld í 17 öðrum löndum tóku þátt í því.

Bandaríska fjármálaráðuneytið sagði í yfirlýsingu að talið væri að vefsíða Genesis væri hýst í Rússlandi.

Vafrakökur (e. cookies) eru upplýsingar sem gera það auðveldara að opna vefsíður sem notandi hefur áður heimsótt. Kökuskrímslið er blá, loðin persóna úr bandarísku barnasjónvarpsþáttunum Sesamsstræti (e. Sesame Street).

• Blogga um frétt