Ferðamanni vísað úr landi vegna nektarmyndar

Rússneskum ferðamanni, sem birti nektarmynd af sjálfri sér fyrir framan heilagt tré á Balí, hefur verið vísað úr landi. Stjórnvöld í Indónesíu greindi frá þessu.

Hin 40 ára Luiza Kosykh var send úr landi á sunnudagskvöld. Var hún send aftur heim til Moskvu en stjórnvöld höfðu hendur í hári hennar í síðustu viku. 

Kosykh var handtekin á miðvikudag eftir að nektarmynd hennar, sem tekin var fyrir framan um 700 ára gamalt tré sem talið er heilagt af hindúum á Balí, fór á flug. Olli myndin reiði á meðal hindúa. 

Konan sagði myndina ekki hafa verið tekna nýlega, heldur fyrir nokkrum árum, og að hún hefði ekki vitað að tréð væri heilagt. 

Kosykh kom til Balí í janúar og fékk tímabundna vegabréfsáritun. Gildir hún þar til í desember á næsta ári.

Búa til leiðarvísi fyrir ferðamenn

Tæpar tvær vikur eru síðan öðrum rússneskum ferðamanni var vísað brott frá Balí, en sá gerðist sekur um að taka mynd af sér berum að neðan á heilögu fjalli á eyjunni. 

Frétt af mbl.is

Vísað úr landi vegna nektarmyndar

Útlendingastofnun Indónesíu hefur þrýst á ferðamálaráðuneyti Balí að flýta því að klára að útbúa leiðarvísi fyrir ferðamenn sem sækja eyjuna heim. 

„Ferðamenn vita ekki allir hvað má og hvað má ekki á Balí. Því hvetjum við heimamenn til að fylgjast með nærumhverfi sínu til að koma í veg fyrir að svona endurtaki sig,“ sagði Anggiat Napitupulu, starfsmaður mannréttindaskrifstofu á Balí.

• Blogga um frétt