Sýknun vegna flugslyss þar sem Íslendingur lést

Franskur dómsstóll hefur sýknað flugfélagið Air France og flugvélaframleiðandann Airbus af ákæru um manndráp af gáleysi vegna flugvélar sem hrapaði í Atlantshafið árið 2009. 228 létust, þar á meðal einn Íslendingur. 

Frétt af mbl.is

Kennsl borin á lík Íslendings

Fram kemur í umfjöllun Guardian að í dóminum segi að ef mistök hafi verið gerð þá sé „ekki hægt að tengja þau með vissu“ við flugslysið. 

Flugvélin, sem var af gerðinni Air­bus A330-203, var á leið frá Rio de Janeiro til Parísar er hún hrapaði í þrumuveðri. 

Fimm dög­um eft­ir hrapið fannst loks brak úr henni og einnig fund­ust tvö lík. Það var þó ekki fyrr en í maí tveim­ur árum síðar að flug­ritinn fannst.

Ophelie Toulliou átti systur sem lést í flugslysinu. Hún var viðstödd dómsuppkvaðninguna í dag. AFP/Bertrand Guay

Ekki hægt að sanna að fyrirtækin bæru ábyrgð

Lögmenn fjölskyldna hinna látnu hafa barist fyrir því í mörg ár að sækja flugfélagið og flugvélaframleiðandann til saka og segja slysið vera versta flugslys í sögu Frakklands. 

Réttarhöld stóðu yfir í tvo mánuði í fyrra þar sem saksóknari sagði að lokum að ekki væri hægt að sanna að fyrirtækin bæru ábyrgð. 

Í skýrslu franskrar rannsóknarnefndar kom fram að hraðamælar vélarinnar, sem kallaðir eru Pitots, hafi bilað í flug­ferðinni aðfaranótt 1. júní 2009. 

Þá sagði að flug­menn­irn­ir hafi ekki brugðist rétt við þegar Air­bus-þotan tók að missa flug­hæð eft­ir að mælarnir biluðu. Þá skorti þjálf­un til að bregðast við bil­uninni. 

Frétt af mbl.is

Mistök flugmanna í feigðarför

• Blogga um frétt