Erlent | AFP | 27.4.2023 | 21:34 | Uppfært 28.4.2023 9:57

Varpa sprengjum úr lofti á ný

Her Súdans hefur varpað sprengjum úr lofti þrátt fyrir að vopnahlé eigi að vera í gildi. AFP

Súdanski herinn lét sprengjur falla á vígi uppreisnarhers RSF í Kartúm, höfuðborg Súdans, í dag. Vopnahlé er í gildi en síðasti dagur þessa 72 klukkustunda vopnahlés rennur út í dag.

Blóðug átök hafa geisað í súdönsku höfuðborginni síðan 15. apríl og hafa allar tilraunir til sátta milli herforingjanna tveggja, Abdel Fattah al-Burhan og Mohamed Hamdan Dagalo, farið út um þúfur. Vopnahléi var komið á í byrjun vikunnar en herir beggja liða hafa ekki virt það að fullu.

Vopnahlé er til miðnættis í kvöld en í gærkvöldi samþykkti súdanski herinn að koma til fundar í Juba, höfuðborg grannríkisins Suður-Súdan.

Hermenn uppreisnarhers RFS. AFP/RFS uppreisnarherinn

Samþykkti framlengt vopnahlé

Al-Burhan samþykkti að framlengja vopnahlé um aðrar 72 klukkustundir en óljóst er hvort uppreisnarher RSF hafi gengist við því boði að því er fram kemur í frétt AFP.

512 almennir borgarar hafa látist í átökunum og vel á fimmta þúsund særst. Eftir að hið meinta vopnahlé tók gildi hafa að minnsta kosti átta almennir borgarar látist í árásunum að sögn heilbrigðisyfirvalda í Kartúm.

Stjórnvöld annarra ríkja hafa frá því átökin brutust út unnið hörðum höndum við að aðstoða ríkisborgara sína að flýja ástandið í Kartúm.

Abdel Fattah al-Burhan og Mohamed Hamdan Dagalo. AFP

Fangar brotist út

Á meðan átökin hafa geisað hefur fjöldi fanga brotist út úr Kober-öryggisfangelsinu. Þar inni sátu meðal annars fylgismenn einræðisherrans Omars al-Bashir. Herinn segir al-Bashir ekki vera á meðal þeirra sem tekist hefur að brjótast út. Hann hafi verið fluttur á herspítala kvöldið áður en átökin brutust út.

Al-Bashir var steypt af stóli árið 2019 í kjölfar fjölmennra mótmæla í landinu. Hefur súdanska þjóðin kallað eftir að lýðræði verði komið á í landinu.

Súdanski herinn og uppreisnarher RSF frömdu valdarán í Súdan árið 2021 og lofuðu í kjölfarið að leiða þjóðina í átt að lýðræði. Þegar sameina átti heri Al-Burhan og Dagalo stirðnaði samband þeirra svo um munaði og átökin brutust út.