Tólf eru fallnir eftir sprengjuárásir Rússa á úkraínskar borgir, höfuðborgina Kænugarð þar á meðal. Tíu féllu í miðborg Uman eftir að loftskeyti hæfði íbúðarhús, samkvæmt yfirvöldum þar.

Móðir og þriggja ára dóttir hennar féllu í borginni Dnipro að því er fram kemur í máli borgarstjóra Dnipro. Þá varð fólk vart við sprengingar í borgunum Kremenchuk og Poltava.

Volodimír Selenskí, forseti Úkraínu, sagði tíu íbúðarhús hafa skemmst í Uman og sagði árásir þessar sýna að frekari aðgerðir væru þarfar gegn Rússlandi á alþjóðlegum vettvangi.

„Það er hægt að stöðva þessa illsku með vopnum og það er okkar varnarlið að gera en það er einnig hægt að stöðva hana með refsiaðgerðum. Það verður að auka alþjóðlegar refsiaðgerðir,“ sagði forsetinn á samfélagsmiðlum.