Yfirvöld í Póllandi hafa tekið yfir menntaskólabyggingu í grennd við rússneska sendiráðið þar í landi, sem ætlað er börnum rússneskra diplómata. Rússneski sendiherrann segir yfirtökuna ólöglega.

Deilan um skólabygginguna, sem byggð var á áttunda áratug síðustu aldar, hefur staðið yfir í ár.

„Byggingin tilheyrir ráðhúsinu í Varsjá,“ sagði Lúkas Jasína, talsmaður pólska utanríkisráðuneytisins, og bætti við að úrskurður dómara lægi fyrir sem heimilaði yfirtökuna.

Fjandsamlegt athæfi

Rússnesk stjórnvöld líta málið öðrum augum.

„Við lítum á þetta sem fjandsamlegt athæfi af hálfu pólskra yfirvalda og skýrt brot á Vínarsáttmálanum frá árinu 1961,“ sagði í yfirlýsingu utanríkisráðuneytis Rússlands. Hótaði ráðuneytið „hörðum viðbrögðum“ vegna yfirtökunnar.

Halda starfsemi áfram

Sergei Andreyev, rússneski sendiherrann í Póllandi, sagði afskiptin ólöglegt inngrip, sér í lagi þar sem kennarar og starfsmenn byggju á skólalóðinni. Þá tók hann fram að skólinn myndi halda starfsemi sinni áfram í annarri byggingu í eigu sendiráðsins.

„Forgangsverkefni okkar er að tryggja öryggi og hagsmuni starfsmanna okkar og fjölskyldna þeirra.“

Í mars á síðasta ári, skömmu eftir að innrás Rússa í Úkraínu hófst, gaf utanríkisráðuneyti Póllands út yfirlýsingu þess efnis að pólskir dómstólar væru búnir að úrskurða að Rússar yrðu að skila byggingum aftur til Pólverja.

Tengdar fréttir

Rússland

Norðurkóreskir hermenn kallaðir til baka frá víglínunni

• Mögulegar samningaviðræður en ekki við Selenskí
• Rússar fangelsa fyrrverandi kennara fyrir skrif á netinu
• Rússar missa mikilvæga höfn
• Yfirgefi svæðin þegar í stað

» Fleiri tengdar fréttir

• Blogga um frétt