Erlent | mbl | 30.4.2023 | 14:10

Fjórir létust í sprengjuárás á rússneskan bæ

Myndin er frá bænum Belgorod, sem er einnig nærri landamærum Rússland og Úkraínu. 20. apríl var gerð sprengjuárás þar. AFP/Telegram Vvgladkov

Fjórir létust og tveir særðust í árás Úkraínumanna á bæinn Suzemka í nótt að sögn ríkisstjóra í Bryansk í Vestur-Rússlandi.

Bærinn er um tólf kílómetra frá landamærum Rússlands að Úkraínu.

Alexander Bogomaz ríkisstjóri greindi frá því á Telegram að bærinn hafi orðið fyrir tveimur sprengjuárásum. Þá hafi rússneskar loftvarnir skotið niður „nokkrar“ eldflaugar.

Að sögn Bogomaz hefur neyðarástandi verið lýst yfir í bænum.

Tíu dagar eru síðan sprengjuárás var gerð á rússnesku borgina Belgorod, sem er um 300 kílómetrum frá Suzemka. Í því tilfelli olli hins vegar rússnesk orrustuþota sprengingunni.