Segir Meloni ekki ráða við verkefnið

Innanríkisráðherra Frakklands segir að Giorgia Meloni, forsætisráðherra Ítalíu, geti ekki leyst þann flóttamannavanda sem ítalska þjóðin standi frammi fyrir. 

Ummæli Gerland Darmanin, innanríkisráðherra Frakklands, eru sögð auka á spennuna í samskiptum Frakka og Ítala. 

Darmanin sagði í útvarpsviðtali í París að Ítalía stæði frammi fyrir mjög alvarlegum flóttamannavanda. Þá sagði hann margt vera svipað með Meloni og Marine Le Pen, sem er leiðtogi Þjóðfylkingarinnar í Frakklandi sem er lengst til hægri á hinum pólitíska ás. 

Franski innanríkisráðherrann sagði í viðtalinu að Meloni réði ekki við þetta verkefni. 

Darmanin var spurður út í komur flóttamanna í suðausturhluta Frakklands, sem á landamæri að Ítalíu. Hann sagði að það væri vaxandi straumur flóttafólks á svæðinu og tók sérstaklega fram að börn væru þar í miklum mæli. 

Mikil spenna

Darmanin lét ummælin falla sama dag og Antonio Tajani, utanríkisráðherra Ítalíu, kom í opinbera heimsókn til Parísar, þar sem hann á fund með Catherine Colonna, utanríkisráðherra Frakklands. 

Ríkisstjórn Frakklands, sem er skipuð flokkum nær miðju, hefur á undanförnum árum ítrekað lent uppi á kant við ríkisstjórnir Ítalíu hvað varðar flóttamannamál. 

Spennan jókst töluvert í samskiptum ríkjanna í nóvember þegar Meloni neitaði að leyfa skipi, sem sigldi á vegum mannúðarsamstaka og var með 230 flóttamenn um borð, að leggjast að bryggju á Ítalíu.  

Skipið fékk á endanum að koma til Frakklands. Frönsk stjórnvöld fordæmdu aðgerðir Ítala og sögðu þetta vera „óviðunandi hegðun“. Þá hættu Frakkar við að taka á móti 3.500 flóttamönnum frá Ítalíu. 

• Blogga um frétt