Úkraínski flugherinn skaut niður sinn eigin dróna fyrir ofan Kænugarð síðdegis í dag. Dróninn er sagður hafa orðið stjórnlaus.

Skothvellir heyrðust í Kænugarði í dag þegar flugherinn skaut í átt að dróna sem var á flugi yfir borginni. Íbúar borgarinnar gerðu í fyrstu ráð fyrir því að um rússneskan dróna væri að ræða, en Rússar gerðu drónaárás á borgina í fyrrinótt. Flugherinn tilkynnti hins vegar síðdegis að dróninn sem skotinn hafi verið niður í dag hafi tilheyrt sér.

Í tilkynningu frá flughernum segir að um kl. 20 að staðartíma (17 á Íslandi) hafi dróni af tegundinni Bayraktar TB2 orðið stjórnlaus þegar hann var á flugi yfir borginni. Dróninn var því skotinn niður í kjölfarið.

Eitt brot úr drónanum féll til jarðar og leiddi þá af sér eldsvoða í verslunarmiðstöð. Bálið dreifði sér um rúma 50 fermetra, að sögn Vítalís Klitsjkó, borgarstjóra Kænugarðs. Engan sakaði.

Tengdar fréttir

Úkraína

Norðurkóreskir hermenn kallaðir til baka frá víglínunni

• Mögulegar samningaviðræður en ekki við Selenskí
• Enginn úr ríkisstjórn Trumps verið í sambandi við Rússa
• Yfirgefi svæðin þegar í stað
• Rússar telja ekkert nýtt felast í hótunum Trumps

» Fleiri tengdar fréttir

• Blogga um frétt