Vantaði líffæri í nokkra liðsmenn sértrúarsafnaðarins

Krufningar á líkum liðsmanna sértrúarsafnaðar í Kenía hafa leitt í ljós að líffæri vantaði í nokkur líkanna. Grunur er um að líffærin hafi verið seld. 

Frétt af mbl.is

Nokkrir voru myrtir

Rúmlega tvær vikur eru síðan lögregla hóf leit á líkum liðsmanna Good News In­ternati­onal Church sértrúarsafnaðarins í Shaka­hola-skógi nærri borginni Malindi. Alls hafa 112 lík fundist og hófst leit lögreglu að líkum aftur í dag, en henni var frestað þar sem lík­hús nærri voru orðin yf­ir­full. 

Paul Nt­henge Mackenzie, leiðtogi Good News In­ternati­onal Church, á að hafa tjáð fylgj­end­um sín­um að þeir myndu hitta Jesú ef þeir sveltu sig. Krufningar leiddu í ljós að nokkrir liðsmenn, þar á meðal börn, voru kyrkt­ir eða barðir til dauða. 

Alls hafa 112 lík fundist. AFP/Yasuyoshi Chiba

„Krufningarskýrslur hafa leitt í ljós skort á líffærum í nokkrum líkum fórnarlambanna,“ sagði Martin Munene yfirlögreglustjóri, í yfirlýsingu sem var lögð fyrir dómstól í höfuðborginni Naíróbí. 

„Talið er að vel skipulögð líffæraviðskipti hafi farið fram,“ sagði í yfirlýsingu Munenes. 

Seldu eigur sínar fyrir söfnuðinn 

Þá sagði Munene að sjónvarpsprédikarinn Ezekiel Odero, sem var handtekinn í apríl en látinn laus gegn tryggingu á fimmtudag, hafi fengið umfangsmiklar peningaupphæðir frá fylgjendum Mackenzie sem seldu eigur sínar samkvæmt fyrirmælum Mackenzie.

Dómstólinn í Naíróbi skipaði yfirvöldum að frysta fleiri en 20 bankareikninga í eigu Oderos í 30 daga. 

Mackenzie gaf sig sjálfur fram 14. apríl og hafa saksóknarar óskað eftir að hann verði í haldi í 90 daga á meðan rannsókn stendur yfir. Dómarinn Yusuf Shikanda mun greina frá ákvörðun sinni á morgun. 

Mackenzie starfaði sem leigubílstjóri áður en hann stofnaði Good News International Church árið 2003. Hann á sjö börn. 

Mackenzie starfaði sem leigubílstjóri áður en hann stofnaði Good News International Church árið 2003. AFP/Simon Maina

• Blogga um frétt