Erlent | mbl | 11.5.2023 | 23:35

Skelfingu lostin yfir TikTok-leik

Eitt ungmennanna styður nánast vísifingri á háspennukapal sem ber allt að 400.000 volta spennu. Stjórnendum Statnett rann kalt vatn milli skinns og hörunds og hafa kært athæfið til lögreglu. Skjáskot/TikTok

„Ég held ég hafi aldrei séð neitt eins skelfilegt og þetta auk þess sem það er lífshættulegt,“ segir Elisabet Vike Vardheim, forstöðumaður dreifingarmála hjá norska raforkufyrirtækinu Statnett, í samtali við norska ríkisútvarpið NRK.

Á hún þar við þann leik unglinga í Froland í Agder-fylki að klífa burðarmöstur fyrir rafmagnslínur og birta myndskeið af athæfinu á samfélagsmiðlinum TikTok undir myllumerkinu #nærdødenopplevelse eða upplifun við dauðans dyr.

Ákváðu stjórnendur Statnett að kæra athæfið til lögreglu í kjölfar þess að hafa séð myndskeiðið sem skaut þeim vægast sagt skelk í bringu. „Ég þakka bara fyrir að þeir sem þarna áttu hlut að máli virðast hafa sloppið óskaddaðir frá þessu,“ segir Vardheim enn fremur.

Fjarlægðu myndskeiðið

Sá eða þeir sem birtu myndskeiðið á TikTok, sem gerðist í mars, fjarlægðu það síðar, en fréttamönnum NRK tókst að fá upplýsingar um að þarna hefðu unglingar búsettir í Froland verið á ferð. Afraksturinn af klifrinu var þeirra framlag til leiks eða bylgju sem nú fer sem eldur í sinu um TikTok og gengur út á að notendur miðilsins leggja sig í augljósan háska, jafnvel lífsháska, og birta af því myndefni.

Myndatökumaður á jörðu niðri myndar einn klifurmanna en sá sem kominn er upp í mastrið tók einnig eigið myndefni. Skjáskot/TikTok

„Í þessum leik eru þátttakendur að leggja líf sitt að veði,“ segir Helge Torsvik, deildarstjóri rannsóknardeildar lögreglunnar í Arendal og Froland, við NRK og staðfestir jafnframt að lögreglu hafi borist kæra vegna háttseminnar.

Í myndskeiðinu má sjá eitt ungmennanna fara háskalega nærri kapli sem flutt getur 400.000 volta spennu en til samanburðar er spenna venjulegrar rafmagnsinnstungu á heimili 240 volt.

„Í sjálfu sér er ekki refsivert að klifra í háspennumöstrum en eigendur þeirra banna það,“ segir deildarstjórinn, „auk þess sem það er heimskulegt og stórhættulegt.“

„Það er erfitt að gera sér annað í hugarlund yfir þessu myndskeiði en að þarna hafi fólk bara verið ljónheppið. Þetta jaðrar við óvitaskap. Þeir hafa bara verið ljónheppnir,“ segir Vardheim hjá Statnett að lokum.

NRK