Lofar Selenskí enn fleiri vopnum
Setja bókamerki
Volodimír Selenskí Úkraínuforseti lenti í Bretlandi í morgun. Þar fór hann á fund Rishis Sunaks forsætisráðherra Bretlands, sem hefur lofað að útvega Úkraínumönnum mörg hundruð fleiri dróna.
Selenskí hefur verið á faraldsfæti undanfarið en hann kom til Bretlands beinustu leið frá Frakklandi þar sem hann ræddi við Emmanuel Macron Frakklandsforseta.
„Bretland er forystuland hvað varðar það að auka getu okkar [til hernaðar] á landi og í lofti,“ skrifar Selenskí á Twitter rétt fyrir fundinn. „Þessi samvinna mun halda áfram í dag. Ég mun hitta vin minn Rishi. Við munum eiga í raunverulegum samningaviðræðum.“
Sunak heilsaði Selenskí með faðmlagi við komu hans í dag. Hann greinir frá því á Twitter þar sem hann skrifar: „Velkominn aftur.“
Mega ekki bregðast Úkraínu
„Þetta er þýðingarmikið augnablik fyrir mótspyrnu Úkraínumanna gegn hræðilegu innrásarstríði sem þeir hvorki völdu né ollu,“ segir Sunak í yfirlýsingu. „Við megum ekki bregðast þeim.“
Sunak segir að þó að forvígi stríðsins séu í Úkraínu teygi víglínurnar sig út um allan heim. Það séu „hagsmunir okkar allra að sjá til þess að Úkraína sigri og villimennska Pútíns verði ekki verðlaunuð“.
Í yfirlýsingu frá breskum stjórnvöldum segir að Sunak muni staðfesta áframhaldandi útvegun Breta á loftvarnarskeytum og drónum, sem eigi að berast til Úkraínu á næstu mánuðum.
Fyrir helgi barst Úkraínumönnum sending af svokölluðum Storm Shadow-loftskeytum. Bretland er það land sem hefur gefið næstmest af skotfærum til Úkraínumanna en Bandaríkjamenn mest.
Ása Ellerup flutt út og ætlar að selja húsið
„Sá vegur er bæði háll og myrkur“
Reiðubúin að aflýsa verkföllum í fjórum leikskólum
Vegirnir voru eins og borðstofuborð
Ekki vandamál að vera karlmaður
50 milljónir eiga að minnka svindl um 1 milljarð
Gasmengun gæti borist yfir höfuðborgarsvæðið