Loftárás var gerð á Kænugarð, höfuðborg Úkraínu, í nótt. Varnarmálayfirvöld sögðu að um einstaklega margslungna árás væri að ræða. 

Að minnsta kosti þrír særðust í árásinni sem samanstóð bæði af eldflaugum og drónum.

Loftvarnarsírenur byrjuðu að hljóma um hálf þrjú í nótt að staðartíma og hljómuðu í tvær klukkustundir. Um er að ræða áttundu loftárásina á Kænugarð í þessum mánuði. 

Hershöfðinginn Val­e­rí Zaluzhní sagði að árás Rússa hefði verið gerð úr norðri, suðri og austri og að 18 eldflaugum hafi verið skotið á borgina. Loftvarnarkerfi Úkraínumanna skaut allar eldflaugarnar niður að hans sögn. 

Serhí Popko, hershöfðingi í Kænugarði, lýsti árásinni sem „hámarksfjölda eldflaugaárása á sem skemmstum tíma“. 

Íbúar borgarinnar voru beðnir um að halda sig fjarri gluggum á meðan brak úr eldflaugum Rússa hrapaði niður á jörðu. 

Vítalí Klitschko borgarstjóri sagði að brak hefði fallið í hverfi í miðbænum, þar á meðal í dýragarði borgarinnar. Mesta eyðileggingin varð í Solomíanskí-hverfi þar sem alþjóðlegi flugvöllur borgarinnar er staðsettur.

Tengdar fréttir

Úkraína

Enginn úr ríkisstjórn Trumps verið í sambandi við Rússa

• Yfirgefi svæðin þegar í stað
• Rússar telja ekkert nýtt felast í hótunum Trumps
• Trump segir Rússa mega búast við frekari aðgerðum
• Fjórir féllu í árás Rússa á Kænugarð

» Fleiri tengdar fréttir

• Blogga um frétt