Leita enn barnanna í frumskóginum

Fjögur börn eru talin hafa lifað af flugslys í Amazon-frumskóginu í Kólumbíu. Flugslysið varð 1. maí síðastliðinn og er barnanna enn saknað. 

BBC greinir frá því að vélin hafi verið á leið frá Araracuara, sem er djúpt í frumskóginum í Suður-Kólumbíu, til San José del Guaviare er hún hvarf að morgni 1. maí. 

Flugmaðurinn hafði tilkynnt vélarbilun. 

100 hermenn tóku þátt í leitinni

Fleiri en 100 hermenn tóku þátt í leitaraðgerðum og fannst vélin á mánudag, tveimur vikum eftir að hún hvarf. 

Lík flugmannsins, aðstoðarflugmanns og hinnar 33 ára gamallar Magdalena Mucutuy fannst nærri flugvélarflakinu í Caquetá-héraði. Mucutuy var móðir barnanna fjögurra sem eru á aldrinum ellefu mánaða til 13 ára. Börnin eru af Huitoto-ættbálknum. 

Leitarhundar fundu drykkjarflösku, skæri, hárteygju og ávexti sem börnin höfðu borðað. Þá fundu björgunarsveitir skjól sem börnin höfðu búið sér til úr greinum.  

Leitarhundar fundu drykkjarföng barnanna. AFP/Kólumbíski herinn

• Blogga um frétt