Erlent | AFP | 21.5.2023 | 21:16 | Uppfært 22.5.2023 11:05

Lýsir yfir stórsigri en ætlar sér hreinan meirihluta

Nýi lýðræðsflokkurinn, flokkur sitjandi forsætisráðherra Kyriakos Mitsotakis, hefur fengið 40,8% talinna atkvæða og er með yfir 20 prósentustiga forskot á Syriza, flokk áskorandans Alexis Tsipras, sem hlotið hefur 20,1% talinna atkvæða. þegar 82% atkvæða hafa verið talin í þingkosningunum í Grikklandi. AFP/Aris Messinis

Þegar 82% atkvæða hafa verið talin í þingkosningunum í Grikklandi er næsta víst að Nýi lýðræðisflokkurinn, flokkur Kyriakos Mitsotakis sitjandi forsætisráðherra, hefur unnið yfirburðasigur.

Flokkurinn hefur fengið 40,8% talinna atkvæða og er með yfir 20 prósentustiga forskot á Syriza, flokk áskorandans Alexis Tsipras, sem hlotið hefur 20,1% talinna atkvæða.

Pólitískur jarðskjálfti

Haft er eftir forsætisráðherranum að íhaldsflokkur hans hafi leyst úr læðingi pólitískan jarðskjálfta með stórsigri sínum í þingkosningunum. Þá gaf Mitsotakis í skyn að hann myndi óska eftir nýjum kosningum með það að markmiði að ná hreinum meirihluta á þinginu og mynda ríkisstjórn án aðkomu annarra.

Þrátt fyrir mikinn sigur vantar íhaldinu nokkur þingsæti upp á hreinan meirihluta. Þannig stendur Mitsotakis frammi fyrir tveimur valkostum; að mynda meirihluta með aðkomu annarra eða reyna að auka fylgi flokks síns enn frekar í nýjum kosningum.

Nýjar kosningar í kortunum

Forsætisráðherrann virðist viss í sinni sök. „Þjóðin vill sterka ríkisstjórn með sjóndeildarhring til fjögurra ára,“ sagði hann. „Pólitískur jarðskjálfti dagsins kallar á að ferlinu verði flýtt í að mynda nýja ríkisstjórn,“ bætti hann við.

Alexis Tsipras, höfuðandstæðingur Mitsotakis, undirbjó sviðið einnig fyrir nýjar kosningar. „Kosningahringnum hefur enn ekki verið lokað. Næsti bardagi verður krítískur og endanlegur.“