Erlent | mbl | 23.6.2023 | 21:29 | Uppfært 24.6.2023 1:08

Bræðravíg í uppsiglingu

Jevgení Prigosjín segist ætla leita hefnda gegn yfirstjórn rússneska hersins. AFP

Jevgení Prigósjín, yfirmaður rússnesku málaliðasveitarinnar Wagner, sakar rússneska herinn um árás á sveitir sínar. Segir það til marks um valdabaráttu og bræðravíg innan Rússlands.

Prigósjín segir að fjöldi liðsmanna hans hafi verið felldur í árásinni og að hann muni leita hefnda fyrir árásina.

Kemur það í kjölfar digurbarkalegrar yfirlýsingar, þar sem hann kenndi rússneska varnamálaráðherranum Sergei Shoígú um það að hafa hafið stríðið í Úkraínu.

Svar Kremlverja

Stjórnvöld í Moskvu neita því alfarið að hafa staðið að baki árásinni á Wagner-hópinn, samkvæmt fréttastofunni Tass. Segja þau enn fremur að ummæli Prigósjíns á samfélagsmiðlum séu sett fram til þess að ögra.

Rússneskir fjölmiðlar hafa líka sagt frá því að leyniþjónustan FSB hafi nú hafið sakamálarannsókn til þess að rannsaka hvort Prigósjín hafi hvatt til vopnaðrar uppreisnar í Rússlandi.

Ekki valdarán

Wagner-málaliðasveitin hefur barist við hlið rússneska hersins í Úkraínu. Grunnt hefur þó verið á því góða og Prigósjín verið óspar á gagnrýni á stjórn rússneska hersins. Prigósjín sagði í hljóðupptöku á samfélagsmiðlinum Telegram að „stöðva þarf þá illsku sem leiðtogar Rússlandshers bera í brjósti“, og bætti við: „Þeim sem ábyrgir eru fyrir dauða drengjanna okkar og tugþúsunda rússneskra hermanna verður refsað.“ Og ummælin urðu fleiri:

„Ég hvet ykkur til að veita ekki mótspyrnu. Hver sá sem gerir það ógnar okkur og verður tortímt. Þannig munum við skilgreina allar varðstöðvar og flugvélar sem við mætum á leið okkar.“