Erlent | mbl | 25.6.2023 | 14:04

Blinken: Sýnir raunverulega bresti í valdi Pútíns

Antony Blinken, utanríkisráðherra Bandaríkjanna, segir skammlífa uppreisn Jevgenís Prikósjíns og Wagners-málaliðanna sýna raunverulega bresti í valdi Pútíns. Samsett mynd/AFP

Antony Blinken, utanríkisráðherra Bandaríkjanna, segir skammlífa uppreisn Jevgenís Prikósjíns og Wagners-málaliðanna sýna raunverulega bresti í valdi Pútíns.

Segir hann uppresinina beina áskorun á vald forsetans og að atburðarrásin veki upp djúpstæðar spurningar. BBC greinir frá.

Upphafið að endi valdatíðar Pútíns

„Ekki séð lokaþáttinn ennþá“

Segir hann of snemmt að segja til um hvað framtíðin beri í skauti sér fyrir Wagner-liða en eins og komið hefur fram hyggjast stjórnvöld í Kreml ekki ákæra uppreisnarmennina.

Segir Blinken að ákvörðun Pútíns um að ráðast inn í Úkraínu hafi skapað ringulreið innan Rússlands.

„Ef við setjum þetta í samhengi þá var Pútín fyrir 16 mánuðum við borgarhliðið í Kænugarði og hugsðist taka borgina á nokkrum dögum - eyða landinu af kortinu. Nú hefur hann þurft að verja Moskvu, höfuðborg Rússlands, gegn málaliðum á eigin vegum,“ sagði Blinken.

Þannig segir hann raunverulega bresti í valdi forsetans en að erfitt sé að segja til um afleiðingarnar á þessari stundu. „Þessi þáttaröð er í sýningu og við höfum ekki séð lokaþáttinn ennþá.“