Rússneskir fjölmiðlar snúast gegn Prígosjín
Setja bókamerki
Eftir mislukkaða uppreisn Jevgení Prígosjín í lok síðasta mánaðar hafa rússneskir fjölmiðlar snúist gegn yfirmanni málaliðahópsins Wagner.
Helstu sjónvarpsstöðvar hafa birt myndefni sem fengið var við húsleit á heimili Prígosjín utan við Pétursborg. Er því haldið fram að ríkidæmi hans varpi mjög slæmu ljósi á Prígosjín.
Gráðugur glæpamaður
Rússneskar sjónvarpsstöðvar rifja nú duglega upp glæpaferil hans og að græðgin ein hafa verið helsti hvati hans. Minna fer þó fyrir því að minnast á þá gagnrýni sem Prígosjín beindi að yfirmönnum hermála í Rússlandi.
Mun þetta vera í fyrsta skipti sem fjölmiðlar í Rússlandi veita Prígosjín svo mikla athygli. Þykir umfjöllunin vera mjög persónuleg og ætlað að draga fram vandræðalega hluti úr fortíð hans. Hingað til hefur umfjöllun um Prígosjín verið frekar jákvæði í rússneskum fjölmiðlum enda barðist hann við hlið rússneska innrásarliðsins í Úkraínu.
Hárkollur og vopn
Myndatökumenn fóru inn á heimili Prígosjín og sýndu eitt og annað, þar á meðal ríkulegan húsbúnað, stafla af reiðufé, hvers kyns vopn og þyrlu í stæði. Eins átti Prígosjín gott safn af hárkollum og úrval falsaðra vegabréfa sem Prígosjín gæti notað undir ólíkum nöfnum.
Fréttamanni í myndskeiðinu þótti þetta hjákátlegt í ljósi þess hve ötull Prígosjín hefur verið í því að saka aðra um spillingu og þjófnað.
Illræmd sleggja
Í myndskeiðunum má líka sjá sleggju á heimili Prígosjín með áletruninni „Notist í mikilvægum samningaviðræðum.“ Sleggjan hefur eflaust vísun í hrottalega aftöku á einum liðsmanni Wagner-hópsins árið 2022, sem sakaður var um svik við hópinn.
Samkvæmt frétt BBC má hér greina algeran viðsnúning í afstöðu rússneskra stjórnvalda og þeirra fjölmiðla sem þau stjórna. Prígosjín sjálfur hefur verið að mestu hljóður á samfélagsmiðlum eftir uppreisn sína og hefur ekkert tjáð sig um ofangreinda umfjöllun.
Spara stórfé með olíukaupum ytra
„Erum í miðri hrinu“: Styttist í Eldvörp
Ástæða til að ætla að eldgosahrinu fari að ljúka
Hraunið náð Njarðvíkuræð: Fylgjast með raflínu
Mæðgur dæmdar til að greiða 64 milljónir
Hraunið við bílastæði Bláa lónsins
Litlar líkur á að hraunið nái til mannvirkja
Mjög alvarlegt ef Njarðvíkuræð gefur sig