Efla landamæravarnir við Hvíta-Rússland
Setja bókamerki
Stjórn Póllands hefur eflt varnir við landamærin að Hvíta-Rússlandi vegna viðveru Wagner-liða í landinu.
BBC greinir frá því að áður fyrr voru landamæravarnir Póllands ekki upp á marga fiska en nú má finna marga kílómetra af háum málmgirðingum, hitamyndavélum og ljóskösturum.
Byrjað var að reisa varnirnar fyrir tveimur árum eftir að hvítrússnesk stjórnvöld hvöttu innflytjendur til að flýja yfir landamærin til Póllands.
Í dag hefst ráðstefna Atlantshafsbandalagsins (NATO) í Vilníus í Litháen og því hafa pólsk yfirvöld sent hundruð landamæraverði til viðbótar á landamæri landsins við Hvíta-Rússland.
„Mesta ógnin er nágranni okkar Hvíta-Rússland. Ríkið er algjörlega óútreiknanlegt,“ sagði Michal Bura landamæravörður við blaðamann BBC.
„Við þurfum að vera undirbúnir fyrir hvers kyns þróun. Kannski verður Wagner vandamál, en enginn veit í raun og veru af hverju þeir eru að fara þangað og hvað þeir eru að undirbúa sig fyrir.“
Tómt tjald í Minsk
Meira en tvær vikur eru síðan Jevgení Prigósjín, stofnandi Wagner-málaliðahópsins, stóð að misheppnaðri uppreisn gegn rússneskum stjórnvöldum. Alexander Lúkasjenkó, forseti Hvíta-Rússlands, hafði milligöngu um samkomulag til að binda enda á aðgerðirnar. Samkomulagið fólst meðal annars í því að Prigósjín og menn hans fengju skjól í Hvíta-Rússlandi.
Á fimmtudag greindi Alexander Lúkasjenkó, forseti Hvíta-Rússlands, að Prigósjín og sveitir hans væru hins vegar í Pétursborg í Rússlandi.
Í Minsk, höfuðborg Hvíta-Rússlands, má finna stórt hvítt tjald, líklega fyrir Wagner-liða, en tjaldið er tómt og ekki hafa sést neinir málaliðar.
Enn starfandi í Rússlandi
BBC greinir frá því að þess í stað séu Wagner-liðar enn starfandi í Rússlandi.
Blaðamaður BBC hafði samband við Wagner um helgina og var honum tjáð að sveitirnar væru enn að taka við nýjum liðsmönnum.
Blaðamanninum barst nánar upplýsingar um hvar hann gæti fundið æfingabúðir málaliðanna í Krasnodar í Suður-Rússlandi, þar sem þær hafa lengi verið.
Blaðamanninum var sagt að koma með sandala fyrir sturturnar og nærföt, þá skyldi hann vera heilsuhraustur og ekki glíma við eiturlyfjafíkn.
Er hann spurði hvort hann yrði sendur til Úkraínu hættu svör að berast.
Fyrsti blaðamannafundurinn í heild sinni
Ný ríkisstjórn kynnt á morgun
Lát hjóna í Neskaupstað: Ákæra gefin út
„Mér finnst gamla Samfylkingin komin aftur“
Barn lést í árásinni
Forstjóri bendir á ábyrgð birgja vegna verðhækkana
„Tímabil aukinnar eldvirkni“
Bjarni: „Útilokað að þetta geti gengið upp“
