Erlent | mbl | 31.7.2023 | 13:41 | Uppfært 1.8.2023 12:35

Wagner-liðar einblína á Afríku og Hvíta-Rússland

Jevgení Prigósjín, leiðtogi Wagner-málaliðahópsins. AFP/Telegram

Jevgení Prigósjín, leiðtogi Wagner-málaliðahópsins, greindi frá því í dag að hópurinn muni starfa áfram í Hvíta-Rússlandi og Afríku, en að Wagner sé ekki að taka við nýjum liðsmönnum að svo stöddu.

Wagner-liðar þjálfa Hvít-Rússa

BBC greinir frá.

Í hljóðskilaboðum sem Prigósjín birti á Telegram sagði hann að hópurinn væri að ákveða sín næstu skref.

Wagner-liðar gegndu lykilhlutverki í átökunum í Úkraínu áður en Prigósjín stóð að misheppnaðri uppreisn gegn rússneskum stjórnvöldum í lok júní.

Þann 24. júní stóð Prigósjín að misheppnaðri uppreisn gegn rússneskum stjórnvöldum. AFP/Roman Romokhov

Í hljóðskilaboðunum greindi Prigósjín frá því að flestir Wagner-liðar væru í fríi eftir „langt tímabil þar sem þeir unnu erfiðisvinnu“.

Þá sagði hann að Wagner væri að ákveða næstu skref sem yrðu „unnin í þágu Rússlands“.

Bíða eftir kalli frá föðurlandinu

Prigósjín sagði að hópurinn myndi nú starfa í Afríku og á æfingastöðvum í Hvíta-Rússlandi.

BBC greinir frá því að vitað sé að Wagner starfi í Sýrlandi, Súdan, Líbíu, Mósambík, Malí og Mið-Afríkulýðveldinu.

Prigósjín sagði í skilaboðunum að hópurinn tæki ekki við nýjum liðsmönnum að sinni en um leið og „föðurlandið þyrfti á nýrri hersveit að halda til að berjast fyrir sig, þá muni Wagner svo sannarlega taka við nýjum liðsmönnum“.

Þá sagði hann að það stæði ekkert í veg fyrir að Wagner-liðar færi sig um set og gangist til liðs við aðrar hersveitir „sem sumir hafi, því miður, nú þegar gert“.

Eftir uppreisnina bauð Vladimír Pútín Rússlandsforseti Wagner-liðum sem tóku ekki þátt í uppreisninni að ganga til liðs við rússneska herinn.