Bandarísk stjórnvöld hyggjast ekki koma ríkisborgurum sínum úr Níger vegna valdaránsins í landinu. Ítölsk stjórnvöld hafa aftur á móti skipulagt sérstakt flug til að koma sínum ríkisborgurum úr landi. 

Greint var frá því á mbl.is í síðustu viku að Ama­dou Abdrama­ne, und­irof­ursti í níg­erska hern­um, hefði sagt í sjón­varps­ávarpi aðfaranótt fimmtu­dags að varn­ar- og ör­ygg­is­sveit­ir lands­ins hefðu ákveðið að setja Mohamed Bazoum for­seta af.

Hann er enn í gíslingu í embættisbústað sínum. Abdoura­hama­ne Omar Tchi­ani, hers­höfðingi og yf­ir­maður líf­varðarsveita for­set­ans, hefur lýst sig sem nýj­an leiðtoga lands­ins.

Frönsk stjórn­völd und­ir­búa aðgerðir til þess að koma frönsk­um borg­ur­um úr Níg­er og bjóða jafnvel öðrum Evrópubúum í Níger laus flugsæti. Ut­an­rík­is­ráðuneyti Þýska­lands hvet­ur einnig þýska rík­is­borg­ara í Níg­er til þess að yf­ir­gefa landið með flug­vél­um Frakka.

Frétt af mbl.is

Hershöfðingi lýsir sig sem nýjan leiðtoga landsins

Engin bein ógn

Um 1.000 bandarískir hermenn eru í Níger. Voru þeir þar til þess að berjast gegn uppreisnarmönnum íslamista í landinu áður en valdaránið var framið. Frakkar eiga einnig fjölda hermanna í Níger en ekki stendur til að fljúga með þá heim.

John Kir­by, talsmaður þjóðarör­ygg­is­ráðs Hvíta húss­ins, sagði á blaðamannafundi að bandarísk stjórnvöld væru „vissulega meðvituð um aðgerðir Frakklands og annarra Evrópuríkja til þess að koma borgurum sínum úr landi. Jafnframt sýnist okkur ekkert gefa til kynna að einhver bein ógn stafi gegn bandarískum ríkisborgurum, svo við höfum ekki breytt um afstöðu til viðveru okkar í Níger“.

Hann heldur því fram að bandarísk stjórnvöld sjái enn fram á að geta átt í samningsviðræðum við herforingjastjórnina í Níger til þess að leysa úr ástandinu í landinu.

„Við höldum áfram að hvetja bandaríska ríkisborgara í Níger til þess að passa upp á það að öryggi sé þeirra fyrsta forgangsatriði,“ segir hann. Bætir hann við að bandarísku hermennirnir í Níger komi ekki til með að hjálpa til við brottflutning evrópskra borgara úr landinu.

Frétt af mbl.is

Frakkar undirbúa brottflutning

Ítalía býður upp á flug heim

„Ítölsk stjórnvöld hafa ákveðið að bjóða samlöndum okkar í Niamey möguleika á að yfirgefa borgina með sérstöku flugi til Ítalíu,“ skrifar Antonio Tajani utanríkisráðherra á samfélagsmiðlinum X (áður Twitter).

Segir hann að ítalska sendiráðið í Niamey, höfuðborg Níger, verði enn „opið og starfandi, einkum til að aðstoða við þau málamiðlunarverkefni sem eru í vændum“.

Ráðuneytið segir við AFP-fréttaveituna að ekki sé um að ræða flótta úr landi heldur „sérstakt flug fyrir þá sem vilja yfirgefa landið“. Alls eru 90 Ítalir í Niamey, en 500 í landinu öllu, mestmegnis hermenn.

Ekki er vitað um að nokkur Íslendingur sé í Níger sam­kvæmt upp­lýs­ing­um frá ut­an­rík­is­ráðuneyti Íslands og þjóðskrá.

Tengdar fréttir

Valdarán í Níger

Vísa Níger úr Afríkubandalaginu

• Hugsanlegar friðarviðræður á morgun
• Tilbúinn að stilla til friðar
• Saka Frakka um að hafa frelsað hryðjuverkamenn
• Blinken varar við Wagner

» Fleiri tengdar fréttir

• Blogga um frétt